پیپلزپارٹی نے سیلاب متاثرین کی مدد کے لیے بھرپور کوششیں کی ہیں ، شرجیل میمن

کراچی :  سندھ کے سینئر وزیر شرجیل انعام میمن نے کہا ہے کہ پنجاب حکومت ہماری چھت کے نیچے وزیراعظم کو نشانہ بنا رہی ہے اور اس سازش کو کامیاب نہیں ہونے دیں گے۔ ان کا کہنا تھا کہ اس وقت پورے ملک کو سیلاب متاثرین کی مدد کے لیے متحد ہونا چاہیے لیکن پنجاب حکومت پیپلزپارٹی اور سندھ حکومت کے خلاف ایک طرفہ مہم چلا رہی ہے۔

شرجیل میمن نے بتایا کہ پیپلزپارٹی نے سیلاب متاثرین کی مدد کے لیے بھرپور کوششیں کی ہیں، اور بلاول بھٹو نے خود متاثرہ علاقوں کے دورے کیے۔ انہوں نے کہا کہ وزیراعظم نے رمضان پیکج بھی بی آئی ایس پی کے ڈیٹا کی بنیاد پر دیا، جبکہ سندھ میں لاکھوں گھر بنائے جا رہے ہیں۔

انہوں نے کہا کہ پنجاب حکومت کا اصل ہدف وفاقی حکومت ہے اور وہ پیپلزپارٹی کو اس تنازعے میں گھسانا چاہتی ہے، لیکن پیپلزپارٹی اس سازش کو کامیاب نہیں ہونے دے گی۔ شرجیل میمن نے کہا کہ وزیراعظم کو پنجاب میں مناسب پروٹوکول نہیں ملتا، لیکن سندھ میں وزیراعلیٰ ان کا پورا احترام کرتے ہیں، یہ سب حسد کا معاملہ ہے۔

انہوں نے پنجاب حکومت کی سیلاب کے دوران کارکردگی کو بھی تنقید کا نشانہ بنایا اور کہا کہ اگر پنجاب حکومت کو وزیراعظم سے کوئی مسئلہ ہے تو پیپلزپارٹی کو اس میں گھسیٹا نہ جائے۔ ان کا کہنا تھا کہ پیپلزپارٹی نے ہمیشہ ملک کے مفاد میں کام کیا ہے اور کسی دھمکی یا سازش سے نہیں ڈرتی۔

شرجیل میمن نے کہا کہ نفرت، لسانیت اور سیاست اس وقت نہیں کرنی چاہیے، اور یہ وقت سب کو مل کر سیلاب متاثرین کی مدد کرنے کا ہے۔ انہوں نے پنجاب میں بلدیاتی انتخابات نہ کرانے پر بھی سوال اٹھایا اور کہا کہ سندھ میں صحت اور بجلی کے شعبے میں بہتر کام ہو رہا ہے۔آخر میں انہوں نے کہا کہ پیپلزپارٹی عوام کی خدمت جاری رکھے گی اور کسی بھی دھمکی یا دباؤ سے نہیں گھبرائے گی۔