اسلام آباد: پاکستان کے صدر آصف علی زرداری اور وزیراعظم محمد شہباز شریف نے بابا گُرو نانک دیو جی کے 556ویں جنم دن کے موقع پر پاکستان اور دنیا بھر میں مقیم سِکھ برادری کو دل کی گہرائیوں سے مبارکباد دی ہے۔
صدر آصف علی زرداری نے اپنے پیغام میں کہا کہ بابا گُرو نانک دیو جی کی تعلیمات امن، محبت اور رواداری پر مبنی ہیں۔ انہوں نے کہا کہ بابا جی کا پیغام انسانیت کی خدمت، محبت اور ہم آہنگی کا علمبردار ہے، جو آج بھی دنیا میں اتحاد اور ہمدردی کا پیغام دیتا ہے۔ صدر زرداری نے کہا کہ پاکستان اقلیتوں کے حقوق کے تحفظ اور مذہبی رواداری کے لیے پُرعزم ہے اور کارتارپور راہداری اس عزم کی ایک بڑی مثال ہے، جو سِکھ یاتریوں کو پاکستان میں اپنے مذہبی مقامات تک رسائی فراہم کرتا ہے۔
وزیراعظم شہباز شریف نے بھی سِکھ برادری کو مبارکباد دیتے ہوئے کہا کہ بابا گُرو نانک کی تعلیمات دنیا بھر کو اتحاد، باہمی احترام اور امن کی اہمیت سکھاتی ہیں۔ انہوں نے کہا کہ حکومت پاکستان تمام مذہبی مقامات کی حفاظت کے لیے پُرعزم ہے اور سِکھ یاتریوں کو سہولت فراہم کرنے کے لیے ہر ممکن کوشش کر رہی ہے۔
وزیراعظم نے کہا کہ بابا گُرو نانک نہ صرف سِکھوں کے روحانی پیشوا ہیں، بلکہ انہوں نے پوری انسانیت کے لیے امن، برابری اور تحمل کا پیغام دیا۔ ان کی تعلیمات آج بھی دنیا کو اتحاد اور رواداری کا درس دیتی ہیں۔ وزیراعظم نے اس بات پر بھی اطمینان کا اظہار کیا کہ پاکستان بابا گُرو نانک دیو جی سے متعلق گوردواروں کی حفاظت کر رہا ہے، خاص طور پر گوردوارہ جنم استھان ننکانہ صاحب کی، اور حکومت اس بات کو یقینی بنا رہی ہے کہ تمام مذہبی اقلیتوں کے حقوق کی حفاظت کی جائے۔
آخر میں وزیراعظم نے دنیا بھر سے اپیل کی کہ وہ بابا گُرو نانک کی تعلیمات سے رہنمائی حاصل کریں اور دنیا کو امن، محبت اور باہمی احترام کا گہوارہ بنانے کے لیے کوششیں کریں۔
NaiBaat | Copyright © 2026
