مشرق وسطیٰ میں جنگ ، توانائی کی بڑھتی ہوئی قیمتوں کے بعد روس یورپ کو گیس کی سپلائی روکنے پر غور کر سکتا ہے ، پیوٹن

ماسکو: روسی صدر ولادیمیر پیوٹن نے کہا ہے کہ مشرق وسطیٰ میں جنگ اور توانائی کی بڑھتی ہوئی قیمتوں کے بعد روس یورپ کو گیس کی سپلائی روکنے پر غور کر سکتا ہے۔ انہوں نے بتایا کہ یورپی یونین روسی گیس اور ایل این جی پر پابندیاں لگانا چاہتی ہے، اور اگر یہ پابندیاں نافذ ہوئیں تو روس کے لیے دیگر منڈیوں، جیسے چین، کی طرف رخ کرنا فائدہ مند ہو سکتا ہے۔

غیر ملکی میڈیا کے مطابق روس یورپ پر توانائی کے انحصار میں کمی کے بعد اپنی گیس اور تیل کی فروخت کے لیے دیگر مارکیٹوں کی طرف بڑھ رہا ہے۔

اس دوران مشرق وسطیٰ میں جنگ چھٹے دن میں داخل ہو گئی ہے۔ امریکا اور اسرائیل ایران پر بمباری کر رہے ہیں، جس میں شہری بھی نشانہ بن رہے ہیں، جبکہ ایران نے امریکی اڈوں اور اسرائیلی فوجی تنصیبات پر جوابی حملے کیے ہیں۔

مزید یہ کہ امریکا عراقی کردوں سے رابطے کر رہا ہے تاکہ وہ ایران کے خلاف زمینی کارروائی کریں، لیکن عراقی کرد ابھی اس معاملے میں ہچکچاہٹ کا شکار ہیں۔