پی آئی اے کی جانب سے اسلام آباد بیجنگ روٹ بحال کرنے کا اعلان

اسلام آباد: پاکستان انٹرنیشنل ایئرلائنز (پی آئی اے) نے 3 جولائی سے اسلام آباد اور بیجنگ کے درمیان براہِ راست پروازوں کی بحالی کا اعلان کر دیا ہے، جس سے پاکستان اور چین کے درمیان فضائی رابطوں کو مزید فروغ ملے گا اور دونوں ممالک کے دیرینہ تعلقات کو تقویت حاصل ہوگی۔

اسلام آباد-بیجنگ-اسلام آباد روٹ کی بحالی ایسے وقت میں کی گئی ہے جب طلبہ، کاروباری شخصیات، سیاحوں اور دونوں ممالک میں مقیم خاندانوں کی جانب سے براہِ راست سفری سہولت کی طلب میں مسلسل اضافہ دیکھا جا رہا ہے۔

قومی فضائی کمپنی کے مطابق نئی سروس مسافروں کو بہتر سفری سہولت، مسابقتی کرایوں اور مناسب بیگیج الاؤنس کے ساتھ زیادہ آرام دہ سفر فراہم کرے گی، جبکہ براہِ راست پروازوں کے باعث سفر کا دورانیہ بھی کم ہوگا۔

یہ پیش رفت خاص طور پر ان پاکستانی اور چینی طلبہ کے لیے خوش آئند قرار دی جا رہی ہے جو ایک دوسرے کے ممالک میں اعلیٰ تعلیم حاصل کر رہے ہیں۔ تعلیمی اداروں، طلبہ تنظیموں اور سفری صنعت سے وابستہ حلقوں نے اس اقدام کا خیر مقدم کرتے ہوئے اسے نئے تعلیمی سال اور بڑھتے ہوئے سفری سیزن کے تناظر میں بروقت فیصلہ قرار دیا ہے۔

ماہرین کے مطابق براہِ راست فضائی رابطے طلبہ، اساتذہ اور محققین کی نقل و حرکت کو آسان بنانے کے ساتھ ساتھ دونوں ممالک کے درمیان تعلیمی تعاون اور تبادلوں کو بھی مزید فروغ دیں گے۔

اس کے علاوہ سیاحوں اور موسمِ گرما کی تعطیلات کے دوران سفر کرنے والے خاندانوں کو بھی اس سروس سے فائدہ پہنچے گا، کیونکہ انہیں زیادہ سہولت اور کم وقت میں اپنی منزل تک رسائی حاصل ہوگی۔

سفری ایجنسیوں اور سیاحت سے وابستہ اداروں کے مطابق اعلان کے بعد مسافروں کی جانب سے نمایاں دلچسپی دیکھنے میں آئی ہے، جو دونوں دوست ممالک کے دارالحکومتوں کے درمیان براہِ راست فضائی رابطے کی اہمیت کو اجاگر کرتی ہے۔

پی آئی اے انتظامیہ نے اپنے بیان میں کہا کہ قومی ایئرلائن پاکستان اور چین کے درمیان سیاحت، تجارت، تعلیم اور ثقافتی روابط کے فروغ کے لیے اپنا کردار جاری رکھے گی۔ انتظامیہ کے مطابق براہِ راست پروازوں کی بحالی عوامی سطح پر روابط کو مزید مستحکم بنانے اور دوطرفہ تعلقات کو نئی جہت دینے کی کوششوں کا حصہ ہے۔

اسلام آباد اور بیجنگ کے درمیان براہِ راست فضائی سروس کی بحالی کو دونوں ممالک کے درمیان سفری رابطوں کے فروغ کی جانب ایک مثبت پیش رفت قرار دیا جا رہا ہے، جو پاکستان اور چین کی مضبوط دوستی اور اسٹریٹجک شراکت داری کو مزید مستحکم بنانے میں معاون ثابت ہوگی۔