پروسٹیٹ کینسر کے علاج کے لیے نئی دوا کے شاندار نتائج

لاہور : پروسٹیٹ کینسر کے جدید مرحلے کے علاج کے لیے تیار کی گئی نئی دوا VIR-5500 کے ابتدائی نتائج کو طبی ماہرین نے انتہائی شاندار قرار دیا ہے۔ یہ دوا امیونو تھراپی پر مبنی ہے، جو جسم کے اپنے مدافعتی نظام کو کینسر کے خلاف متحرک کرتی ہے۔ اس علاج نے نہ صرف موجودہ رسولیوں کو سکڑنے میں مدد دی بلکہ ان کی مزید بڑھوتری کو بھی روکا ہے۔

کینسر کے ماہرین اس دوا کے نتائج کو بہت مثبت مانتے ہیں، خاص طور پر اس لیے کہ روایتی امیونو تھراپیز پروسٹیٹ کینسر میں ماضی میں زیادہ مؤثر ثابت نہیں ہو سکیں۔ یہ تھراپیز عموماً رسولیوں کو کم کرنے میں ناکام رہیں اور مریضوں میں شدید ضمنی اثرات کا سبب بنی تھیں۔

VIR-5500 کی ایک خاص بات یہ ہے کہ اس میں ایک منفرد "خفیہ نظام" استعمال کیا گیا ہے، جو دوا کو صرف رسولی تک پہنچنے کے بعد فعال کرتا ہے۔ اس کا مطلب یہ ہے کہ اس دوا کے مضر اثرات کا خطرہ کم ہو جاتا ہے۔

امریکن سوسائٹی آف کلینیکل آنکولوجی (ASCO) کے جینیٹویورینری کینسرز سمپوزیم میں محققین نے اس دوا کو 58 مریضوں پر آزمایا، جن میں اگلے مرحلے کا پروسٹیٹ کینسر تھا اور دوسرے علاجوں کا اثر ختم ہو چکا تھا۔ ان نتائج سے یہ ظاہر ہوتا ہے کہ VIR-5500 نے کینسر کی رسولیوں کو سکڑنے میں نمایاں کامیابی حاصل کی ہے، جو پروسٹیٹ کینسر کے علاج میں نئی امیدوں کی علامت ہے۔