امریکی ایوان نمائندگان نے صدر ٹرمپ کے ٹیکس اور بجٹ بل کی منظوری دے دی

واشنگٹن : امریکہ کے ایوان نمائندگان نے صدر ڈونلڈ ٹرمپ کے ٹیکس اور اخراجات سے متعلق بل کو منظوری دے دی ہے، جسے پہلے سینیٹ میں بھی نہایت کم اکثریت سے منظور کیا جا چکا ہے۔ ایوان میں اس بل کے حق میں 218 اور مخالفت میں 214 ووٹ ڈالے گئے۔

اب یہ بل صدر ٹرمپ کے دستخط کے لیے بھیجا جائے گا، جہاں وائٹ ہاؤس کا کہنا ہے کہ وہ آج شام 5 بجے اسے قانونی شکل دیں گے۔ اس بل کے ذریعے صدر ٹرمپ کی کئی اہم پالیسیوں کو قانونی تحفظ ملے گا، لیکن اس کے نتیجے میں ملک کے قرضے میں 3.3 ٹریلین ڈالر کا اضافہ بھی ہوگا۔

اس قانون کے تحت 2017 میں دی گئی ٹیکس چھوٹ کو مزید بڑھایا جائے گا، اور ٹپس اور اوورٹائم پر بھی نئے ٹیکس ریلیف دیے جائیں گے۔ اس کے علاوہ فوجی بجٹ اور امیگریشن کے اداروں کے اخراجات میں اضافہ ہوگا، لیکن غریب افراد کے لیے صحت اور خوراک کی سہولیات میں کمی کی جائے گی۔