گوتریس کا وینزویلا میں امریکی فوجی کارروائی پر تشویش کا اظہار

نیو یارک : اقوام متحدہ کے سیکرٹری جنرل انتونیو گوٹیرس نے وینزویلا پر امریکی فوجی کارروائی پر گہری تشویش کا اظہار کرتے ہوئے کہا ہے کہ اس اقدام کے خطے پر سنگین اثرات مرتب ہو سکتے ہیں۔ گوٹیرس کے ترجمان نے کہا کہ سیکرٹری جنرل اس کارروائی کو پریشان کن سمجھتے ہیں اور ان کا ماننا ہے کہ اس سے پورے لاطینی امریکہ میں کشیدگی اور عدم استحکام پیدا ہو سکتا ہے۔

امریکہ کے اس اقدام پر روس، ایران، کولمبیا اور کیوبا نے سخت تنقید کی ہے۔

روس کی وزارت خارجہ نے کہا کہ لاطینی امریکہ کو "امن کا علاقہ" ہونا چاہیے اور مزید کشیدگی سے بچنے کے لیے فوری طور پر بات چیت کا آغاز کرنا ضروری ہے۔ انہوں نے زور دیا کہ تمام فریقین کو باہمی مشاورت کے ذریعے اس بحران کا حل نکالنا چاہیے۔

ایران نے امریکی کارروائی کو وینزویلا کی قومی خودمختاری اور علاقائی یکجہتی کی خلاف ورزی قرار دیا ہے۔ ایرانی حکام نے اقوام متحدہ کی سلامتی کونسل سے فوری ردعمل کا مطالبہ کیا اور کہا کہ اس حملے کے ذمہ داروں کو جواب دہ ٹھہرانا ضروری ہے۔

اسپین نے وینزویلا کے مسئلے کے پُرامن حل کے لیے ثالثی کی پیشکش کی ہے اور کہا ہے کہ وہ اس بحران کے حل میں اپنی جانب سے کردار ادا کرنے کے لیے تیار ہیں۔