وزیراعظم شہباز شریف کا گلگت بلتستان میں بارشوں اور سیلاب کے نقصانات کا جائزہ، موسمیاتی تبدیلیوں پر قابو پانے کے اقدامات کی ضرورت پر زور

گلگت :  وزیراعظم شہباز شریف گلگت بلتستان کے ایک روزہ دورے پر پہنچے جہاں انہوں نے حالیہ بارشوں اور سیلاب سے ہونے والے نقصانات کا خود جائزہ لیا۔

وزیراعظم نے کہا کہ پاکستان موسمیاتی تبدیلیوں کی وجہ سے شدید متاثر ہو رہا ہے اور اس چیلنج سے نمٹنے کے لیے فوری اور مؤثر اقدامات ضروری ہیں۔ انہوں نے بتایا کہ حالیہ بارشوں اور سیلاب کی وجہ سے گلگت میں جانی اور مالی نقصان ہوا ہے جس پر وہ گہرے دکھ کا اظہار کرتے ہیں۔

شہباز شریف نے کہا کہ وفاقی ادارے گلگت بلتستان حکومت کے ساتھ مل کر کام کر رہے ہیں تاکہ متاثرین کو فوری مدد فراہم کی جا سکے۔ انہوں نے بتایا کہ اگرچہ پاکستان عالمی سطح پر کاربن گیسز کے اخراج میں بہت کم حصہ رکھتا ہے، پھر بھی وہ دنیا کے ان دس ممالک میں شامل ہے جو موسمیاتی تبدیلیوں سے سب سے زیادہ متاثر ہیں۔

وزیراعظم نے وزارت موسمیاتی تبدیلی کو ہدایت دی ہے کہ وہ ان مسائل کے حل کے لیے فوری اقدامات کریں اور این ڈی ایم اے کے کردار کو سراہا۔

اس کے علاوہ، انہوں نے گلگت میں دانش اسکول کے قیام اور سولر پارک کے منصوبے کی جلد تکمیل کی بھی ہدایت دی اور کہا کہ وہ خود ان منصوبوں کی نگرانی کریں گے۔

وزیراعظم کے دورے کے دوران گورنر اور وزیراعلیٰ گلگت بلتستان نے ان کو بارشوں اور سیلاب کی صورتحال، جاری ترقیاتی کام اور امن و امان کے حوالے سے بریفنگ دی۔