”خاموشی کی وبا“

انسانی تاریخ میں مختلف ادوار ایسے گزرے ہیں جب دنیا کو کسی نہ کسی بڑے بحران کا سامنا کرنا پڑا۔ کبھی جنگوں نے انسانی بستیوں کو ویران کیا، کبھی وبائی امراض نے لاکھوں جانیں نگل لیں اور کبھی معاشی بحرانوں نے قوموں کی بنیادیں ہلا کر رکھ دیں۔ مگر موجودہ دور میں ایک ایسا بحران بھی جنم لے رہا ہے جو بظاہر دکھائی نہیں دیتا، جس کی کوئی طبی تشخیص ممکن نہیں اور جس کے اثرات آہستہ آہستہ انسانی معاشرے کی روح کو متاثر کر رہے ہیں۔ یہ بحران ”خاموشی کی وبا“ہے۔ ایک ایسی خاموشی جو انسانوں کے درمیان بڑھتی ہوئی دوریوں، کم ہوتے ہوئے مکالمے اور معدوم ہوتی انسانی وابستگیوں کی شکل میں ہمارے سامنے موجود ہے۔ ”مکالمے کا خاتمہ“ ایک ایسا بحران ہے جس سے بہت سی قباحتیں، غلط فہمیاں اور المیے جنم لے رہے ہیں۔ 
یہ بات بظاہر حیران کن لگتی ہے کہ آج کا انسان تاریخ کے کسی بھی دور کے مقابلے میں زیادہ مربوط ہے۔ انٹرنیٹ، سوشل میڈیا، موبائل فون اور جدید مواصلاتی ذرائع نے دنیا کو ایک عالمی گاو¿ں میں تبدیل کر دیا ہے۔ چند سیکنڈ میں ایک براعظم سے دوسرے براعظم تک پیغام پہنچ جاتا ہے۔ ویڈیو کالز کے ذریعے ہزاروں میل دور موجود افراد ایک دوسرے کو دیکھ اور سن سکتے ہیں۔ لیکن اس تمام تر تکنیکی ترقی کے باوجود انسان کے اندر تنہائی کا احساس بڑھتا جا رہا ہے۔ لوگ رابطے میں تو ہیں مگر تعلق میں نہیں، گفتگو تو کرتے ہیں مگر مکالمہ نہیں کرتے۔ گھروں کے مناظر اس تبدیلی کی واضح تصویر پیش کرتے ہیں۔ کبھی شام ڈھلے خاندان کے افراد ایک دسترخوان پر جمع ہوتے، دن بھر کے واقعات بیان کرتے، ایک دوسرے کے مسائل سنتے اور مشورے دیتے تھے۔ آج اکثر گھروں میں ہر فرد اپنے موبائل فون کی دنیا میں گم ہے۔ ایک ہی چھت کے نیچے رہنے والے لوگ جسمانی طور پر قریب لیکن ذہنی اور جذباتی طور پر ایک دوسرے سے دور ہوتے جا رہے ہیں۔ والدین بچوں کے ساتھ وقت گزارنے کے بجائے سکرینوں میں مصروف ہیں اور بچے حقیقی تعلقات کے بجائے ورچوئل دنیا میں سکون تلاش کر رہے ہیں۔
سوشل میڈیا نے جہاں اظہارِ رائے کے بے شمار مواقع فراہم کیے ہیں، وہیں اس نے مکالمے کے معیار کو بھی متاثر کیا ہے۔ آج ہر شخص کے پاس اپنی بات کہنے کا پلیٹ فارم موجود ہے لیکن دوسروں کی بات سننے کا حوصلہ کم ہوتا جا رہا ہے۔ اختلافِ رائے کو علمی بحث کے بجائے ذاتی حملہ سمجھا جاتا ہے۔ نتیجتاً برداشت، رواداری اور دلیل کی ثقافت کمزور پڑ رہی ہے۔ لوگ اپنے خیالات کے حصار میں بند ہوتے جا رہے ہیں اور صرف انہی آوازوں کو اہمیت دیتے ہیں جو ان کی سوچ کی تائید کرتی ہوں۔ سیاسی میدان میں بھی خاموشی کی یہ وبا خطرناک حد تک سرایت کر چکی ہے۔ سیاسی جماعتیں ایک دوسرے کے مو¿قف کو سمجھنے کے بجائے صرف اپنی بات منوانے پر زور دیتی ہیں۔ پارلیمان جو قومی مسائل کے حل کے لیے مکالمے کا سب سے بڑا فورم ہونا چاہیے، اکثر الزام تراشی اور محاذ آرائی کا مرکز بن جاتی ہے۔ جب مکالمہ ختم ہو جائے تو اتفاقِ رائے کی راہیں مسدود ہو جاتی ہیں اور قومیں انتشار کا شکار ہونے لگتی ہیں۔ تعلیمی ادارے بھی اس رجحان سے محفوظ نہیں رہے۔ جدید تعلیم نے معلومات تک رسائی کو آسان بنا دیا ہے لیکن تنقیدی سوچ اور مکالمے کی روایت کو مطلوبہ توجہ نہیں مل رہی۔ طلبہ کتابوں کے بجائے مختصر ویڈیوز اور فوری معلومات پر انحصار کرنے لگے ہیں۔ نتیجتاً مطالعے کی عادت کمزور پڑ رہی ہے اور گہرائی کے ساتھ سوچنے کی صلاحیت متاثر ہو رہی ہے۔ جب معاشرے میں غور و فکر کم ہو جائے تو فکری پختگی بھی کمزور پڑ جاتی ہے۔
خاموشی کی اس وبا کا ایک اور پہلو ذہنی صحت سے جڑا ہوا ہے۔ دنیا بھر میں ڈپریشن، اضطراب اور ذہنی دباو¿ کے مریضوں کی تعداد میں مسلسل اضافہ ہو رہا ہے۔ ماہرین نفسیات کے مطابق انسان کو اپنی بات کہنے، اپنے جذبات کا اظہار کرنے اور دوسروں سے حقیقی تعلق قائم کرنے کی ضرورت ہوتی ہے۔ جب یہ مواقع محدود ہو جائیں تو انسان اندر ہی اندر گھٹنے لگتا ہے۔ بسا اوقات ایک مخلص سامع اور چند حوصلہ افزا الفاظ وہ کام کر جاتے ہیں جو مہنگی ترین ادویات بھی نہیں کر سکتیں۔ دلچسپ حقیقت یہ ہے کہ خاموشی کی یہ وبا شور کے درمیان پروان چڑھ رہی ہے۔ ٹی وی چینلز، سوشل میڈیا پلیٹ فارمز، ویڈیوز، پوڈکاسٹس اور اطلاعات کے بے شمار ذرائع ہر وقت متحرک ہیں۔ بظاہر ایسا محسوس ہوتا ہے کہ دنیا پہلے سے زیادہ بول رہی ہے، مگر حقیقت یہ ہے کہ سننے کا عمل کمزور پڑتا جا رہا ہے۔ ہر شخص اپنی بات پہنچانے میں مصروف ہے لیکن دوسروں کی بات سمجھنے کے لیے وقت نکالنے کو تیار نہیں۔ معاشرتی سطح پر اس رجحان کے اثرات نہایت گہرے ہیں۔ خاندان کمزور ہو رہے ہیں، دوستیاں سطحی بنتی جا رہی ہیں اور معاشرے میں اعتماد کا بحران پیدا ہو رہا ہے۔ انسانوں کے درمیان موجود جذباتی رشتے جب کمزور پڑ جائیں تو معاشرہ محض افراد کا ہجوم بن کر رہ جاتا ہے۔ ایسی صورت حال میں اجتماعی شعور، قومی یکجہتی اور سماجی ہم آہنگی بھی متاثر ہوتی ہے۔ اس مسئلے کا حل کسی پیچیدہ پالیسی یا مہنگے منصوبے میں پوشیدہ نہیں بلکہ انسانی رویوں کی اصلاح میں ہے۔ ہمیں دوبارہ سننے کا ہنر سیکھنا ہوگا۔ گھروں میں مشترکہ نشستوں کو فروغ دینا ہوگا، بچوں کے ساتھ وقت گزارنا ہوگا، کتابوں سے دوستی بحال کرنا ہوگی اور اختلافِ رائے کو دشمنی کے بجائے سیکھنے کا موقع سمجھنا ہوگا۔ تعلیمی اداروں کو بھی مکالمے، مباحثے اور تنقیدی سوچ کی حوصلہ افزائی کرنی چاہیے تاکہ نئی نسل محض معلومات کا ذخیرہ نہ بنے بلکہ فہم و ادراک کی دولت سے بھی مالا مال ہو۔
تاریخ گواہ ہے کہ بڑی تہذیبیں صرف معاشی قوت، عسکری طاقت یا سائنسی ترقی کی بنیاد پر قائم نہیں رہتیں بلکہ ان کی اصل طاقت مکالمے، برداشت اور باہمی احترام میں ہوتی ہے۔ جب معاشرے میں سننے اور سمجھنے کی روایت زندہ ہو تو اختلاف بھی ترقی کا ذریعہ بن جاتا ہے، لیکن جب مکالمے کے دروازے بند ہو جائیں تو ترقی کے راستے بھی تنگ پڑنے لگتے ہیں۔ آج ضرورت اس امر کی ہے کہ ہم ٹیکنالوجی کے فوائد سے انکار کیے بغیر انسانی تعلقات کی اہمیت کو دوبارہ پہچانیں۔ ہمیں یاد رکھنا چاہیے کہ انسان محض معلومات کا نہیں بلکہ احساسات کا بھی محتاج ہے۔ اگر ہم نے مکالمے، تعلق اور باہمی اعتماد کی روایت کو زندہ نہ کیا تو ممکن ہے آنے والے وقت میں ہمارے پاس رابطے کے ہزاروں ذرائع ہوں، مگر دلوں تک پہنچنے کا کوئی راستہ نہ بچے۔اور شاید یہی خاموشی کی وبا کا سب سے خطرناک اور المناک پہلو ہے۔ ہمیں مکالمے کو فروغ دینا ہے کہ اسی سے مسائل کے حل کی راہ نکلتی ہے۔