واٹس ایپ میں جلد فیس بک اور انسٹاگرام سے پروفائل پکچر بدلنے کی سہولت متوقع

کیلیفورنیا : اگر آپ بھی اپنی واٹس ایپ پروفائل پکچر بدلنا پسند کرتے ہیں تو آپ کے لیے خوشخبری ہے۔ اب جلد ہی آپ اپنی واٹس ایپ پروفائل کی تصویر فیس بک اور انسٹاگرام سے بھی بدل سکیں گے۔

فی الحال واٹس ایپ پر پروفائل پکچر بدلنے کے لیے آپ یا تو کیمرہ سے تصویر لیتے ہیں، یا فون کی گیلری سے کوئی تصویر منتخب کرتے ہیں، یا AI امیجز اور اوتار کا استعمال کرتے ہیں۔ لیکن اب واٹس ایپ میں ایسا نیا فیچر آنے والا ہے جس میں آپ براہ راست فیس بک اور انسٹاگرام کے اکاؤنٹس سے اپنی پروفائل تصویر امپورٹ کر سکیں گے۔

ویب بیٹا انفو کے مطابق یہ فیچر اینڈرائیڈ کے بیٹا ورژن میں دیکھنے کو ملا ہے، جہاں آپ واٹس ایپ کے پروفائل مینو میں فیس بک اور انسٹاگرام سے تصویر منتخب کرنے کے دو نئے آپشنز دیکھ سکیں گے۔ یہ سہولت آپ کی مرضی سے آن یا آف کی جا سکتی ہے اور اس سے آپ کی سکیورٹی پر کوئی فرق نہیں پڑے گا۔

ابھی یہ فیچر صرف کچھ بیٹا ٹیسٹرز کے لیے دستیاب ہے، مگر جلد ہی تمام صارفین اسے استعمال کر سکیں گے۔ دلچسپ بات یہ ہے کہ فیس بک اور انسٹاگرام میں اگر آپ اپنی پروفائل پکچر بدلیں تو وہ تبدیلی دوسرے پلیٹ فارم پر بھی خود بخود آ جاتی ہے۔