ٹک ٹاک نے میسجنگ کو بہتر بنانے کے لیے نئے فیچرز کا اضافہ کر دیا

بیجنگ: ویڈیو شیئرنگ پلیٹ فارم ٹک ٹاک نے صارفین کے باہمی رابطے کو مزید مؤثر بنانے کے لیے ڈائریکٹ میسجنگ سسٹم میں کئی جدید فیچرز شامل کرنے کا اعلان کیا ہے۔ کمپنی کا مقصد صارفین کو صرف ویڈیوز دیکھنے تک محدود رکھنے کے بجائے، انہیں پلیٹ فارم پر زیادہ متعامل (interactive) بنانے کی سہولت فراہم کرنا ہے۔

نئے فیچرز کے تحت، اب صارفین اپنے پیغامات میں ایک منٹ تک کی آڈیو ریکارڈنگ بھیج سکیں گے۔ اس کے علاوہ، ایک چیٹ میں بیک وقت نو ویڈیوز یا تصاویر شیئر کرنے کی سہولت بھی متعارف کروائی گئی ہے، جو یا تو فون سے براہ راست بنائی جا سکتی ہیں یا گیلری سے منتخب کی جا سکتی ہیں۔ اس کے ساتھ ایڈیٹنگ ٹولز بھی دستیاب ہوں گے تاکہ مواد کو حسبِ منشا ترتیب دیا جا سکے۔

ٹک ٹاک کے مطابق، یہ تبدیلیاں پلیٹ فارم کو زیادہ سماجی رابطے کا ذریعہ بنانے کی کوشش کا حصہ ہیں، تاکہ صارفین ایک دوسرے سے براہِ راست بات چیت اور مواد کی باہمی شیئرنگ بھی کر سکیں، بالکل انسٹاگرام اور واٹس ایپ کی طرح۔

ایپ کی پالیسی کے تحت 16 سال سے کم عمر صارفین کے لیے ڈائریکٹ میسجز غیر فعال رہیں گے، جبکہ 16 سے 18 سال کے نوجوانوں کو نامناسب تصاویر سے تحفظ دینے کے لیے خودکار نظام فعال کیا گیا ہے۔ بالغ صارفین اپنی سہولت کے مطابق چیٹ فلٹرز کو آن یا آف کر سکتے ہیں۔

کمپنی نے واضح کیا ہے کہ یہ فیچرز مرحلہ وار جاری کیے جائیں گے اور جلد ہی تمام صارفین کو دستیاب ہوں گے۔