پاکستانی کرکٹ کی کارکردگی پر سوالیہ نشان، ٹیسٹ رینکنگ میں نمایاں تنزلی

کراچی: آئی سی سی کی جاری کردہ ٹیسٹ رینکنگ ایک بار پھر پاکستان کرکٹ ٹیم کی مجموعی کارکردگی پر سوالیہ نشان چھوڑ گئی ہے۔ بیٹنگ کے شعبے میں ایک بھی پاکستانی کھلاڑی ٹاپ 10 میں موجود نہیں، جو ٹیم کی حالیہ کارکردگی کی عکاسی کرتا ہے۔

بابر اعظم، جو کچھ عرصہ قبل ٹاپ 5 میں شامل تھے، اب 22ویں نمبر پر آ چکے ہیں، جبکہ سعود شکیل اور رضوان بھی تنزلی کا شکار ہوئے۔

بولنگ میں اگرچہ نعمان علی ٹاپ 5 میں موجود ہیں، مگر وہ بھی ایک درجہ نیچے سرک چکے ہیں۔ شاہین، ساجد اور ابرار جیسے بولرز تسلسل برقرار رکھنے میں ناکام نظر آئے۔

ماہرین کا کہنا ہے کہ پاکستان کو ٹیسٹ فارمیٹ میں اپنی حکمت عملی اور کھلاڑیوں کی تکنیکی تربیت پر سنجیدگی سے توجہ دینی ہوگی تاکہ مستقبل میں عالمی درجہ بندی میں اپنا کھویا ہوا مقام دوبارہ حاصل کیا جا سکے۔