فلسطینی نمائندوں کو ویزے سے محروم کر کے امریکا نے آواز دبانے کی کوشش کی: محمود عباس

غزہ: فلسطینی صدر محمود عباس نے امریکا سے مطالبہ کیا ہے کہ وہ اقوامِ متحدہ کے اجلاس میں شرکت کے لیے فلسطینی وفد کو ویزے جاری کرے۔ ان کا کہنا ہے کہ فلسطینیوں کی آواز کو عالمی سطح پر دبایا جا رہا ہے، جو ایک غیر منصفانہ اور ناقابل قبول عمل ہے۔

یہ بیان ایسے وقت میں سامنے آیا ہے جب امریکی محکمہ خارجہ نے صدر محمود عباس سمیت تقریباً 80 فلسطینی نمائندوں کو ویزے جاری کرنے سے انکار کر دیا۔ فلسطینی قیادت نے اس فیصلے کی سخت مذمت کرتے ہوئے کہا ہے کہ یہ اقدام بین الاقوامی اصولوں اور سفارتی روایات کے خلاف ہے۔

صدر عباس نے واضح کیا کہ امریکا کا یہ رویہ نہ صرف اقوامِ متحدہ کے منشور کی خلاف ورزی ہے، بلکہ یہ فلسطینی مسئلے کو مزید دبانے کی ایک کوشش بھی ہے۔

دوسری جانب یورپی یونین نے بھی اس امریکی فیصلے پر تشویش کا اظہار کرتے ہوئے مطالبہ کیا ہے کہ امریکا اپنے مؤقف پر نظرِ ثانی کرے تاکہ تمام اقوام کو عالمی سطح پر اپنی آواز بلند کرنے کا حق دیا جا سکے۔