بھارتی مسافروں کی بدتہذیبی کا خمیازہ: تھائی لینڈ نے ویزا قوانین سخت کر دیے، بھارت کا سیاحتی امیج بری طرح متاثر

بینکاک:دنیا کے مختلف ممالک میں بھارتی سیاحوں کے غیر مہذب رویوں اور قوانین سے انحراف کے باعث بھارت کی سیاحتی سفارتکاری کو بین الاقوامی سطح پر شدید سبکی کا سامنا کرنا پڑ رہا ہے۔ عالمی سطح پر بھارتی مسافروں کی بڑھتی ہوئی بدتہذیبی کے پیشِ نظر اب دیگر ممالک نے ان کے لیے اپنے دروازے سخت کرنا شروع کر دیے ہیں۔

اس سلسلے میں سیاحت کے لیے معروف ملک تھائی لینڈ نے بڑا قدم اٹھاتے ہوئے بھارتی شہریوں کے لیے ویزا قوانین میں سخت ترین ترامیم نافذ کر دی ہیں۔ تھائی حکام کا کہنا ہے کہ یہ فیصلہ بھارتی سیاحوں کی جانب سے مسلسل سامنے آنے والے نامناسب طرزِ عمل اور مقامی ضوابط کی خلاف ورزیوں کے بعد کیا گیا ہے۔

تھائی لینڈ کی نئی سفارتی پالیسی کے تحت بھارتی مسافروں کے لیے سابقہ ویزا سہولیات کو ختم یا محدود کر دیا گیا ہے۔ اب تھائی لینڈ کا سفر کرنے والے بھارتی شہریوں کو ویزا آن ارائیول (Visa on Arrival) یا دیگر مقررہ ویزا کیٹیگریز کے تحت سخت ترین اسکریننگ اور کڑے طریقہ کار سے گزرنا ہوگا، جس کے بعد ہی انہیں ملک میں داخلے کا پرمٹ جاری کیا جائے گا۔