عالمی انسانی سمگلنگ کے دن کے موقع پر وزیراعظم شہباز شریف کا پیغام

اسلام آباد : وزیراعظم پاکستان، شہباز شریف نے انسانی سمگلنگ کے مسئلے کے خلاف حکومت کے عزم کا اعادہ کیا ہے اور کہا ہے کہ اس سنگین جرم کو جڑ سے ختم کرنے کے لیے سخت اقدامات کیے جا رہے ہیں۔ عالمی انسانی سمگلنگ کے دن کے موقع پر اپنے پیغام میں وزیراعظم نے اس بات پر زور دیا کہ یہ دن اس جرم کی سنگینی کو اجاگر کرنے اور عوامی شعور بیدار کرنے کے لیے منایا جا رہا ہے۔

شہباز شریف نے کہا کہ انسانی سمگلنگ ایک منظم گروہی جرم ہے جس میں جرائم پیشہ گروہ معاشی مشکلات کا شکار افراد کو جھوٹے وعدوں سے بہکاتے ہیں، جس کے نتیجے میں یہ افراد بدترین استحصال کا شکار ہوتے ہیں۔ وزیراعظم نے گزشتہ برسوں میں سمندر میں تارکین وطن کے ہلاک ہونے والے واقعات کا ذکر کرتے ہوئے کہا کہ یہ انسانی سمگلنگ کی حقیقت کو بے نقاب کرتے ہیں۔

انہوں نے بتایا کہ وفاقی حکومت نے انسانی سمگلنگ کے خلاف ایک خصوصی ٹاسک فورس تشکیل دی ہے، جو ملوث افراد کے خلاف سخت کارروائیاں کر رہی ہے۔ وزیراعظم نے ایف آئی اے، انٹیلی جنس بیورو اور دیگر قانون نافذ کرنے والے اداروں کی محنت کی تعریف کی اور کہا کہ ان کی کوششوں سے اس جرم میں کمی آئی ہے۔

وزیراعظم نے عوام کو خبردار کیا کہ غیر قانونی یا گمراہ کن راستوں سے بیرون ملک جانے کا انتخاب نہ کریں کیونکہ یہ نہ صرف جان کے لیے خطرناک ہے بلکہ قوانین کی بھی خلاف ورزی ہے۔

آخر میں، وزیراعظم نے میڈیا، سول سوسائٹی اور بین الاقوامی شراکت داروں سے اپیل کی کہ وہ اس مہم میں حکومت کا ساتھ دیں تاکہ ایک محفوظ اور استحصال سے پاک معاشرہ قائم کیا جا سکے۔