وزیراعظم کا بے گھر افراد کے لیے بڑا ریلیف: 'اپنا گھر اسکیم' کے تحت 321 ارب روپے کے پیکج کا اعلان

اسلام آباد: وزیراعظم شہباز شریف نے "اپنا گھر اسکیم" کا باقاعدہ آغاز کرتے ہوئے ملک بھر کے عوام کے لیے ایک کروڑ روپے تک کے ہاؤسنگ لون کا اعلان کیا ہے۔ اس اسکیم کا دائرہ کار وفاق سمیت چاروں صوبوں، کشمیر اور گلگت بلتستان تک پھیلا ہوا ہے، جس کا مقصد پانچ لاکھ خاندانوں کو اپنی چھت فراہم کرنا ہے۔ پہلے مرحلے میں 50 ہزار گھروں کے لیے 321 ارب روپے مختص کیے گئے ہیں۔
قرض لینے والوں کو پہلے 10 سال تک صرف 5 فیصد مارک اپ ادا کرنا ہوگا، جو کہ موجودہ معاشی تناظر میں ایک بڑی رعایت ہے۔ عوام کی سہولت کے لیے قرض کی واپسی کا دورانیہ 20 سال رکھا گیا ہے۔
تقریب سے خطاب کرتے ہوئے وزیراعظم کا کہنا تھا کہ تعمیراتی شعبہ (Construction Sector) معیشت میں انجن کا کردار ادا کرتا ہے۔ اس اسکیم سے نہ صرف گھر تعمیر ہوں گے بلکہ سیمنٹ، سریا اور اینٹوں سمیت 40 سے زائد صنعتوں کو فروغ ملے گا، جس سے ملک میں روزگار کے ہزاروں نئے مواقع پیدا ہوں گے۔
وزیراعظم شہباز شریف نے منصوبے کی شفافیت پر زور دیتے ہوئے کہا  میں خود ماہانہ بنیادوں پر اس اسکیم کی پیش رفت کی نگرانی کروں گا۔ ہمارا ہدف 5 لاکھ گھروں کی تعمیر ہے اور ہم اس بات کو یقینی بنائیں گے کہ یہ سہولت ہر مستحق پاکستانی تک پہنچے۔