صدر آصف زرداری کی پیپلز پارٹی جنوبی پنجاب کے وفد سے ملاقات، مسائل کے حل کے لیے مل کر چلنے پر زور

لاہور: صدرِ مملکت آصف علی زرداری نے کہا ہے کہ عوامی مسائل کا حل تب ہی ممکن ہے جب تمام طبقے مل کر، مشاورت اور تعاون کے ساتھ آگے بڑھیں۔

یہ بات انہوں نے گورنر ہاؤس لاہور میں پیپلز پارٹی جنوبی پنجاب کے وفد سے ملاقات کے دوران کہی۔ وفد میں ذکا اشرف، ممتاز علی چانگ، مخدوم شہاب الدین اور مخدوم طاہر شامل تھے۔ ملاقات میں جنوبی پنجاب کے عوام کو درپیش مسائل اور دیگر اہم معاملات پر تفصیل سے بات چیت ہوئی۔ وفد نے صدر مملکت کو علاقے کی صورتحال اور عوامی مشکلات سے آگاہ کیا۔

صدر زرداری نے گفتگو میں کہا کہ جمہوریت کو مضبوط بنانے اور اداروں کو مستحکم رکھنے کے لیے سیاسی جماعتوں کے درمیان اتفاق، مکالمہ اور تعاون بہت ضروری ہے۔ انہوں نے کہا کہ تمام سیاسی قوتوں کو مل کر کام کرنا ہوگا تاکہ ملک اور عوام کے مسائل کا پائیدار حل نکالا جا سکے۔