ایران اپنے ہمسایہ ممالک، روس اور چین کے ساتھ تعلقات کو مضبوط کرنا چاہتا ہے، صدر مسعود پزشکیان

تہران : ایرانی صدر مسعود پزشکیان نے کہا ہے کہ ایران اپنی خارجہ پالیسی میں سب سے پہلے اپنے ہمسایہ ممالک کے ساتھ گہرے اور قریبی تعلقات کو فروغ دے گا۔ اس کے بعد وہ روس، چین، برکس، شنگھائی تعاون تنظیم اور یوریشین یونین جیسے اہم بین الاقوامی شراکت داروں کے ساتھ روابط کو مضبوط بنائے گا۔

انہوں نے بتایا کہ یورپی ممالک اور دنیا کے دوسرے حصوں کے ساتھ بھی ایران حکمت اور مصلحت کے تحت تعاون جاری رکھے گا۔

صدر پزشکیان نے اسرائیل کی جانب سے ایران پر کیے گئے حملے کو شدید تنقید کا نشانہ بنایا اور کہا کہ یہ حملہ امریکی حمایت میں کیا گیا تھا۔ انہوں نے کہا کہ ایران کی قوم نے اس جارحیت کے خلاف زبردست مزاحمت کی ہے۔

اس دوران ایران کی سفارتی ٹیم نے عالمی سطح پر اسرائیلی جارحیت کی مذمت کروائی، اور تقریباً تمام عالمی اداروں نے اس کارروائی کی مخالفت کی۔

صدر نے افسوس کا اظہار کیا کہ عالمی طاقتیں اس قسم کی جارحیت کو جائز ٹھہرانے کی کوشش کرتی ہیں۔ انہوں نے رہبر انقلاب آیت اللہ علی خامنہ ای کے بیان کو بھی دہرایا کہ ایران کی دفاعی فورسز ہمیشہ ملک کی حفاظت کے لیے تیار رہیں اور سفارتکاری کو بھی اولین اہمیت دی جائے۔