پاکستان میں فی تولہ سونا 1,000 روپے مہنگا، نئی قیمت 3 لاکھ 61 ہزار 700 روپے تک جا پہنچی

کراچی: ملک بھر میں قیمتی دھاتوں کی منڈی میں ایک بار پھر تیزی دیکھنے میں آئی ہے، جہاں سونے کی قیمت میں نمایاں اضافہ ریکارڈ کیا گیا ہے۔ آل پاکستان صرافہ جیولرز ایسوسی ایشن کے مطابق، سونے کی فی تولہ قیمت میں 1,000 روپے کا اضافہ ہوا ہے، جس کے بعد سونے کی نئی قیمت 3 لاکھ 61 ہزار 700 روپے ہو گئی ہے۔

دوسری جانب 10 گرام سونا بھی 857 روپے مہنگا ہو کر 3 لاکھ 10 ہزار 99 روپے تک جا پہنچا ہے۔

مارکیتی تجزیہ کاروں کے مطابق، یہ اضافہ عالمی منڈی میں سونے کی قیمتوں میں اتار چڑھاؤ، ڈالر کے مقابلے میں روپے کی گرتی ہوئی قدر اور سرمایہ کاروں کی جانب سے سونے کی طرف بڑھتے رجحان کا نتیجہ ہے۔

سونے کی قیمت میں اس اضافے نے عام صارفین اور بالخصوص شادی کی تیاریوں میں مصروف افراد کے لیے مالی بوجھ مزید بڑھا دیا ہے۔ شہری حلقوں کی جانب سے مطالبہ کیا جا رہا ہے کہ حکومت سونے کی قیمتوں کو مستحکم رکھنے کے لیے عملی اقدامات کرے۔