دریائے چناب میں پانی کی سطح بلند، پنجاب کے مختلف اضلاع میں سیلابی صورتحال، نقل مکانی جاری

لاہور: پنجاب میں مون سون بارشوں کا سلسلہ مسلسل چوتھے روز بھی جاری ہے۔ لاہور، گوجرانوالہ سمیت کئی اضلاع میں ہونے والی بارش کے باعث نشیبی علاقوں میں پانی جمع ہوگیا، جبکہ مختلف مقامات پر معمولاتِ زندگی بھی متاثر ہوئے۔

ادھر دریائے چناب میں پانی کے بہاؤ میں اضافے کے باعث ہیڈ مرالہ، ہیڈ خانکی اور ہیڈ قادرآباد کے مقامات پر سیلابی صورتحال پیدا ہوگئی ہے۔ سیلابی پانی حافظ آباد، چنیوٹ اور جھنگ کے نشیبی علاقوں میں داخل ہونے سے ہزاروں ایکڑ زرعی اراضی زیرِ آب آ گئی ہے۔

ضلعی انتظامیہ کے مطابق دریائے چناب کے کنارے واقع آبادیوں سے لوگوں کی محفوظ مقامات پر منتقلی کا عمل جاری ہے، جبکہ ریسکیو اور امدادی ٹیمیں متاثرہ علاقوں میں تعینات ہیں۔ حکام نے ممکنہ مزید بارشوں اور دریا میں پانی کے بہاؤ میں اضافے کے پیشِ نظر شہریوں کو احتیاطی تدابیر اختیار کرنے اور متعلقہ اداروں کی ہدایات پر عمل کرنے کی ہدایت کی ہے۔