واٹس ایپ نے سٹیٹس کیلئے نیا اے آئی امیج جنریٹر فیچر متعارف کروا دیا

کیلیفورنیا : واٹس ایپ نے اپنے سٹیٹس اپ ڈیٹس کے لیے ایک نیا فیچر متعارف کرایا ہے جس میں مصنوعی ذہانت (AI) کا استعمال کیا گیا ہے۔ اس فیچر کا نام "اے آئی سے تیار کردہ تصاویر برائے سٹیٹس" رکھا گیا ہے، جس کے ذریعے صارفین اپنے سٹیٹس کے لیے جملہ لکھ کر واٹس ایپ سے تصاویر حاصل کر سکیں گے۔

صارفین کو بس ایک جملہ یا وضاحتی عبارت لکھنی ہوگی جیسے "سورج غروب ہو رہا ہے" یا "رات کا روشن آسمان"، اور واٹس ایپ خودبخود اس تھیم سے مطابقت رکھنے والی تصاویر تیار کر دے گا۔ اس فیچر میں آپ مختلف تخلیقی تصاویر میں سے پسندیدہ انتخاب کر سکتے ہیں، اور ان میں ایموجی، سٹیکر یا عبارت بھی شامل کر سکتے ہیں۔

یہ فیچر دراصل واٹس ایپ کے پہلے سے موجود اے آئی بیسڈ وال پیپر فیچر کا ایک حصہ ہے، جس کے ذریعے صارفین اپنی چیٹس کے پس منظر کے لیے تصاویر بنا سکتے ہیں۔

یہ فیچر فی الحال کچھ اینڈرائیڈ اور آئی فون صارفین کو دستیاب ہے اور اسے دنیا بھر میں مرحلہ وار متعارف کرایا جا رہا ہے۔ میٹا کا کہنا ہے کہ یہ فیچر ان کی مصنوعی ذہانت کے استعمال کو بڑھانے کی حکمت عملی کا حصہ ہے، تاکہ واٹس ایپ کو صرف ایک چیٹنگ ایپ کی بجائے تخلیقی اظہار کا پلیٹ فارم بنایا جا سکے۔