سردی کی اچانک واپسی: ملک بھر میں بادلوں کا راج، لاہور سمیت پنجاب میں موسلا دھار بارش اور ژالہ باری

اسلام آباد/لاہور: ملک کے طول و عرض میں موسم نے ایک بار پھر پلٹا کھا لیا ہے، جہاں مغربی ہواؤں کے طاقتور سلسلے نے گرمی کا زور توڑ کر سردی کی لہر کو دوبارہ زندہ کر دیا ہے۔ لاہور سمیت پنجاب کے وسطی و جنوبی اضلاع میں گرج چمک کے ساتھ موسلا دھار بارش اور شدید ژالہ باری ریکارڈ کی گئی ہے، جس سے درجہ حرارت میں نمایاں کمی واقع ہوئی ہے۔
ملک کے بالائی اور میدانی علاقوں میں موسم کی صورتحال کچھ یوں ہے۔مری، گلیات، سوات اور گلگت بلتستان کے بلند پہاڑوں پر برف باری کا سلسلہ جاری ہے، جس سے مناظر انتہائی دلفریب ہو گئے ہیں۔پنجاب اور خیبر پختونخوا کے میدانی علاقوں میں بارش کے ساتھ ہونے والی ژالہ باری نے موسم کو خوشگوار بنا دیا ہے، تاہم بعض مقامات پر کھڑی فصلوں کو نقصان پہنچنے کا خدشہ بھی ظاہر کیا جا رہا ہے۔
محکمہ موسمیات نے عید الفطر کے موقع پر شہریوں کے لیے خوشخبری سناتے ہوئے کہا ہے کہ  عید کے ایام میں گرمی کی شدت میں اضافے کا کوئی امکان نہیں۔ بیشتر شہروں میں بادلوں کا ڈیرہ رہے گا، جبکہ وقفے وقفے سے ہلکی بارش عید کی خوشیوں کو چار چاند لگا دے گی۔مری اور شمالی علاقوں کا رخ کرنے والے سیاحوں کو برف باری اور پھسلن کے باعث محتاط رہنے کی ہدایت کی گئی ہے۔