اسلام آباد اور راولپنڈی میں بارش و ژالہ باری، موسم خوشگوار

اسلام آباد: وفاقی دارالحکومت اسلام آباد اور راولپنڈی میں حالیہ بارش اور ژالہ باری کے باعث موسم خوشگوار ہو گیا ہے۔ گرج چمک کے ساتھ ہونے والی بارش نے شہر میں ٹھنڈی ہوائیں چلائیں، جس سے گرمی کی شدت میں کمی آئی۔

راولپنڈی کے چونترہ علاقے میں شدید ژالہ باری ہوئی جس کے باعث کھڑی گندم کی فصلیں متاثر ہو گئیں۔ اولے بہت بڑے سائز کے تھے، جس سے فصلوں کو نقصان پہنچا۔ مری میں بھی کالی گھٹائیں چھا گئیں اور تیز ہواؤں کے ساتھ ہلکی بارش کا سلسلہ شروع ہوا، جس سے سیاح خوبصورت مناظر سے محظوظ ہوئے۔ خان پور میں بھی بارش اور ژالہ باری ہوئی، جس کے بعد گرمی کا زور کم ہوا۔

وادی نیلم میں موسلادھار بارش کا سلسلہ جاری رہا، جس سے دریائے نیلم اور ندی نالوں کا پانی بڑھ گیا۔ تیز ہواؤں اور آندھی کی وجہ سے پاور ہاؤس کے فیڈر ٹرپ کر گئے، جس سے بجلی کی فراہمی متاثر ہوئی۔