پاکستان کے مختلف شہروں میں دھند اور فضائی آلودگی، کئی موٹر ویز بند

لاہور : ملک کے مختلف حصوں میں شدید دھند کی وجہ سے حد نگاہ متاثر ہوئی جس کے باعث متعدد موٹر ویز بند کر دی گئیں۔ موٹر وے ایم ون، جو پشاور سے رشکئی اور صوابی سے برہان تک جاتی ہے، بند کر دی گئی۔ اسی طرح، ایم 2 لاہور سے کوٹ مومن، اور ایم 3 فیض پور سے جڑانوالہ تک بھی بند کر دی گئیں۔ موٹر وے ایم 5 پر ملتان سے روہڑی تک گاڑیوں کا داخلہ مکمل طور پر روک دیا گیا۔

دھند کی وجہ سے لاہور سیالکوٹ موٹروے ایم 11 بھی بند ہو گئی۔ اس کے علاوہ گوجرانوالہ، بہاولپور، احمد پور شرقیہ، رحیم یار خان اور صادق آباد میں بھی شدید دھند چھائی رہی جس کے باعث قومی شاہراہوں پر حد نگاہ کم ہو گئی اور ٹریفک کی روانی متاثر ہوئی۔ موٹر وے پولیس نے شہریوں کو غیر ضروری سفر سے گریز کرنے کی ہدایت کی ہے۔

اسی دوران، ملک میں فضائی آلودگی بھی ایک مسئلہ بنی رہی۔ لاہور دنیا کے سب سے آلودہ شہروں میں شامل ہو گیا جہاں ایئر کوالٹی انڈیکس 428 تک پہنچ گیا۔ رحیم یار خان میں 459، گوجرانوالہ میں 447 اور فیصل آباد میں 434 کی سطح پر ایئر کوالٹی ریکارڈ کی گئی۔