پاکستان اور سعودی عرب کا نیا دفاعی معاہدہ، پاکستان حرمین شریفین کے تحفظ کا حصہ بن گیا

ریاض : پاکستان اور سعودی عرب کے درمیان ایک اہم دفاعی معاہدہ طے پا گیا ہے، جس کے تحت پاکستان اب نہ صرف اپنے دفاع میں بلکہ حرمین شریفین کی حفاظت میں بھی شامل ہو گیا ہے۔

اس معاہدے کی تیاری میں خاص طور پر آرمی چیف فیلڈ مارشل سید عاصم منیر کا بڑا کردار رہا ہے۔ یہ معاہدہ دونوں ملکوں کے طویل عرصے سے چلتے آ رہے فوجی تعاون اور مشترکہ مشقوں کو ایک مضبوط اور باضابطہ دفاعی شراکت داری میں بدل دیتا ہے۔

وزیراعظم شہباز شریف اور آرمی چیف کو سعودی عرب میں زبردست عزت و احترام کے ساتھ خوش آمدید کہا گیا، جو اس تعلق کی گہرائی اور بھائی چارے کو ظاہر کرتا ہے۔ یہ رشتہ صرف سفارتی نہیں بلکہ عقیدت اور اعتماد کی بنیاد پر قائم ہے، خاص طور پر حرمین شریفین اور روضۂ رسولؐ کی حفاظت کی وجہ سے۔

اس معاہدے کے مطابق اگر کسی ایک ملک پر حملہ ہوتا ہے تو اسے دونوں ممالک پر حملہ سمجھا جائے گا، جس سے خطے میں دفاعی اتحاد اور سلامتی مزید مضبوط ہو گی۔

یہ معاہدہ نہ صرف خطے میں امن قائم رکھنے میں مددگار ثابت ہوگا بلکہ پاکستان اور سعودی عرب کے درمیان اقتصادی، سفارتی اور عسکری شعبوں میں تعاون کے نئے دروازے بھی کھولے گا۔