کالعدم جوائنٹ ایکشن کمیٹی سے منسوب آڈیو لیک، انتشار پھیلانے کی مبینہ گفتگو سامنے آگئی

اسلام آباد: کالعدم جوائنٹ ایکشن کمیٹی سے منسوب ایک مبینہ آڈیو کال منظرعام پر آئی ہے جس میں بعض افراد کے درمیان مبینہ طور پر احتجاجی حکمت عملی اور صورتحال کو خراب کرنے سے متعلق گفتگو کا انکشاف ہوا ہے۔

ذرائع کے مطابق آڈیو میں ایڈووکیٹ شاہ نواز اور ماجد علی نامی افراد کے درمیان گفتگو سنی جا سکتی ہے، جس میں مبینہ طور پر سڑکیں اور ہسپتال بند کرنے کی منصوبہ بندی پر بات چیت کی جا رہی ہے۔

مبینہ ریکارڈنگ میں یہ بھی دعویٰ کیا گیا ہے کہ بعض افراد حالات کو مزید کشیدہ کرنے اور عوام کو مشتعل کرنے کے لیے اشتعال انگیز نعروں کے استعمال پر غور کر رہے ہیں۔

ذرائع کے مطابق آڈیو میں رضاکارانہ گرفتاری دینے والے افراد کو روکنے اور ریاستی اداروں کے خلاف اکسانے سے متعلق گفتگو بھی شامل ہے۔

تاہم اس آڈیو کی آزادانہ طور پر تصدیق نہیں ہو سکی، جبکہ متعلقہ فریقین کی جانب سے بھی فوری طور پر کوئی مؤقف سامنے نہیں آیا۔