فیلڈ مارشل کی متحدہ عرب امارات کے قومی سلامتی کے مشیر سے ملاقات

ابوظہبی: چیف آف ڈیفنس فورسز فیلڈ مارشل سید عاصم منیر نے کہا ہے کہ متحدہ عرب امارات کی سلامتی اور استحکام پاکستان کی سلامتی کا لازمی حصہ ہیں۔ انہوں نے یہ بات متحدہ عرب امارات کے نائب حکمران اور قومی سلامتی کے مشیر شیخ طحنون بن زاید النہیان سے ابوظہبی میں ہونے والی ملاقات کے دوران کہی، جس میں دونوں ممالک کے درمیان تعاون پر بات چیت کی گئی۔

اس ملاقات میں دونوں رہنماؤں نے معاشی تعاون، سرمایہ کاری اور سیکیورٹی کے شعبوں میں روابط کو مزید مضبوط بنانے پر اتفاق کیا۔ فیلڈ مارشل عاصم منیر نے خطے میں امن و استحکام کے لیے مشترکہ کوششوں کی اہمیت پر بھی زور دیا۔

انہوں نے متحدہ عرب امارات کی پاکستان کی معیشت اور سیکیورٹی میں کئی دہائیوں سے جاری مسلسل حمایت اور سرمایہ کاری پر شکریہ ادا کیا، جسے دونوں ممالک کے تاریخی تعلقات کا مظہر قرار دیا۔

فیلڈ مارشل نے مزید کہا کہ پاکستان اور متحدہ عرب امارات کے درمیان گہری اسٹریٹجک شراکت داری ہے، اور یو اے ای کی سلامتی کا پاکستان کی سلامتی سے گہرا تعلق ہے۔ انہوں نے عزم ظاہر کیا کہ پاکستان اس شراکت داری کو مزید مستحکم کرنے کے لیے مشترکہ کوششیں جاری رکھے گا تاکہ دونوں ممالک کے مفادات کا تحفظ ہو اور خطے میں امن، استحکام اور خوشحالی کو فروغ ملے۔