حضرت داتا گنج بخشؒ کے 982 ویں عرس کی تقریبات کا آخری دن، آج رات خصوصی دعا کے ساتھ اختتام ہوگا

لاہور: برصغیر کے عظیم صوفی بزرگ، حضرت داتا گنج بخش علی ہجویریؒ کے 982 ویں سالانہ عرس کی تین روزہ تقریبات آج اپنے آخری مرحلے میں داخل ہو گئی ہیں۔ عرس کا اختتام آج رات خصوصی دعا کے ساتھ ہوگا، جس میں ملک کی سلامتی، خوشحالی اور امت مسلمہ کے اتحاد کے لیے دعائیں مانگی جائیں گی۔

عرس کے تیسرے روز بھی داتا دربار پر زائرین کی آمد کا سلسلہ جاری رہا۔ دور دراز علاقوں سے آئے عقیدت مندوں نے مزار پر حاضری دی، پھولوں کی چادریں چڑھائیں اور تبرک تقسیم کیا۔ دربار کے احاطے میں قرأت، نعت خوانی اور سماع کی محفلوں نے روحانی ماحول کو مزید پرنور بنا دیا۔

زائرین کے لیے دودھ کی سبیلیں، نذر و نیاز اور لنگر کا اہتمام چوبیس گھنٹے جاری رہا، جبکہ مزار کے اطراف لگائے گئے اسٹالز سے لوگوں نے مختلف اشیاء کی خریداری بھی کی۔

پنجاب حکومت نے عرس کی مناسبت سے آج لاہور میں عام تعطیل کا اعلان کیا ہے تاکہ شہری آسانی سے شرکت کر سکیں۔ سیکیورٹی کے سخت انتظامات کیے گئے ہیں۔ داتا دربار جانے والے بیشتر راستے کنٹینرز اور خار دار تاریں لگا کر بند کر دیے گئے ہیں، تاہم پیدل افراد اور موٹر سائیکل سواروں کے لیے مخصوص راستے کھلے رکھے گئے ہیں۔

عرس میں شرکت کرنے والے زائرین کا کہنا تھا کہ داتا گنج بخشؒ کا عرس صرف ایک روحانی اجتماع نہیں بلکہ محبت، اخوت اور باہمی احترام کا پیغام ہے۔