آپریشن غضب الحق: پاک فوج کا افغان طالبان کی جارحیت پر کاری ضرب، ٹل سیکٹر میں سرحد پار پوسٹیں تباہ

راولپنڈی : پاک افغان سرحد پر کشیدگی کے تناظر میں پاک فوج نے "آپریشن غضب الحق" کے تحت فتنہ الخوارج اور ان کے سرپرستوں کے خلاف مؤثر اور ٹارگٹڈ کارروائیاں تیز کر دی ہیں۔
سکیورٹی ذرائع کے مطابق، پاک فوج نے پاک افغان سرحد پر ٹل سیکٹر سے ملحقہ علاقوں میں افغان طالبان کی دفاعی پوسٹوں کو نشانہ بنایا۔ اس کارروائی کی اہم تفصیلات درج ذیل ہیں۔ پاک فوج کی درست نشانے بازی کے نتیجے میں افغان طالبان کی متعدد پوسٹیں مکمل طور پر زمین بوس ہو گئیں۔
 یہ کارروائی افغان طالبان کی جانب سے مسلسل کی جانے والی اشتعال انگیزی اور جارحیت کے جواب میں کی گئی ہے۔ذرائع کا کہنا ہے کہ آپریشن غضب الحق کے ذریعے فتنہ الخوارج کے ٹھکانوں اور ان کے سہولت کاروں کو نشانہ بنایا جا رہا ہے۔ پاک فوج کی جانب سے واضح پیغام دیا گیا ہے کہ ملکی سلامتی پر کوئی سمجھوتہ نہیں کیا جائے گا اور ہر جارحیت کا بھرپور اور فیصلہ کن جواب دیا جائے گا۔
سکیورٹی ماہرین کے مطابق، سرحد پار سے ہونے والی کسی بھی مشکوک نقل و حرکت اور دہشت گردوں کی پشت پناہی کو روکنے کے لیے پاک فوج کے دستے سرحدوں پر ہائی الرٹ ہیں اور جدید ترین دفاعی نظام کے ذریعے کڑی نگرانی کی جا رہی ہے۔