غزہ کی زمین پر کوئی ترک فوجی نہیں آئے گا ، اسرائیل کا واضح موقف

تل ابیب : اسرائیلی وزیراعظم کی ترجمان شوش بیڈروسیئن نے ایک بار پھر اسرائیل کا مؤقف واضح کرتے ہوئے کہا ہے کہ غزہ میں تعینات کی جانے والی بین الاقوامی فوج میں ترکی کے فوجی دستوں کو شامل کرنا اسرائیل کے لیے ناقابل قبول ہے۔ انہوں نے یہ بھی بتایا کہ اسرائیل نے امریکا کو بھی بتا دیا ہے کہ وہ غزہ میں ترکی کی فوجی موجودگی کو کسی صورت نہیں مانے گا۔

ترجمان نے صحافیوں سے بات کرتے ہوئے کہا، "غزہ کی زمین پر کوئی ترک فوجی نہیں آئے گا۔" اس سے پہلے بھی اسرائیل نے یہی موقف اپنایا تھا کہ وہ امریکی منصوبے کے تحت غزہ میں ترکی کے فوجیوں کو نہیں دیکھنا چاہتا۔

اسرائیلی وزیر خارجہ گیڈیون سار نے بھی گزشتہ ماہ ہنگری میں ایک پریس کانفرنس میں کہا تھا کہ جو ممالک غزہ میں اپنی فوج بھیجنے کے لیے تیار ہیں، انہیں اسرائیل کے ساتھ منصفانہ رویہ اپنانا چاہیے۔ انہوں نے کہا کہ ترکی نے اردوان کی قیادت میں اسرائیل کے خلاف دشمنی کا رویہ اختیار کیا ہے، اس لیے اسرائیل کو یہ قابل قبول نہیں کہ ترکی کی فوج غزہ میں داخل ہو۔

اسرائیلی حکومت نے اپنے امریکی اتحادیوں کو بھی اس بات کی سختی سے آگاہ کر دیا ہے کہ وہ غزہ میں ترک فوج کی موجودگی کی اجازت نہیں دیں گے۔ یہ معاملہ اسرائیل اور ترکی کے تعلقات میں مزید کشیدگی پیدا کر رہا ہے۔