ملک کے بیشتر حصوں میں شدید دھند، بعض علاقوں میں کہرا پڑنے کا امکان

اسلام آباد: پاکستان کے محکمہ موسمیات نے آئندہ 24 گھنٹوں کے دوران ملک بھر کے موسم کا تفصیلی جائزہ جاری کیا ہے۔

رپورٹ کے مطابق، کل ملک کے بیشتر علاقوں میں سرد اور خشک موسم برقرار رہنے کا امکان ہے، جب کہ پہاڑی علاقے شدید سردی کا شکار رہ سکتے ہیں۔

پنجاب، بالائی سندھ اور خیبرپختونخوا کے میدانی علاقوں میں دھند کی شدت میں اضافے کی پیش گوئی کی گئی ہے، اور پوٹھوہار کے علاقے اور کشمیر میں صبح کے وقت کہیں کہیں کہرا پڑ سکتا ہے۔

رپورٹ میں یہ بھی بتایا گیا کہ گزشتہ 24 گھنٹوں کے دوران تربت میں 1 ملی میٹر بارش ہوئی، جبکہ پنجاب، بالائی سندھ اور خیبرپختونخوا کے میدانی علاقوں میں دھند کی وجہ سے معمولات زندگی متاثر ہوئے۔

ملک کے مختلف علاقوں میں آج کم سے کم درجہ حرارت درج ذیل رہا: لہہ -14°C، سکردو -13°C، استور اور گوپس -10°C، ہنزہ اور گلگت -8°C، قلات اور بگروٹ -6°C، اور دیر -5°C۔

محکمہ موسمیات کے مطابق، اسلام آباد میں کم سے کم درجہ حرارت 0°C، کوئٹہ -3°C، مری -1°C، لاہور اور کراچی 9°C، پشاور 1°C، اور مظفرآباد میں 3°C ریکارڈ کیا گیا۔ شہریوں کو سردی اور دھند کے دوران احتیاطی تدابیر اختیار کرنے کی ہدایت کی گئی ہے۔