دنیا بھر میں آج 10 دسمبر کو انسانی حقوق کا عالمی دن منایا جا رہا ہے

لاہور: پاکستان سمیت دنیا بھر میں آج 10 دسمبر کو انسانی حقوق کا عالمی دن منایا جا رہا ہے، جس کا مقصد لوگوں کو بنیادی انسانی حقوق کے بارے میں آگاہی فراہم کرنا، موجودہ اقدامات کا جائزہ لینا اور مستقبل کے لائحہ عمل پر غور کرنا ہے۔ یہ دن 1948 میں اقوام متحدہ کی جانب سے منظور کیے گئے "یونیورسل ڈیکلریشن آف ہیومن رائٹس" کی یاد دلاتا ہے، جو انسانی حقوق کے عالمی سطح پر تسلیم کیے جانے کا سنگ میل تھا۔

اس اعلامیے کو دنیا بھر کی تقریباً 375 زبانوں اور لہجوں میں ترجمہ کیا جا چکا ہے، جس کے باعث یہ دنیا کی سب سے زیادہ ترجمہ شدہ دستاویز بن چکی ہے۔ دوسری جنگ عظیم کے فوراً بعد یہ قرارداد منظور کی گئی، جس نے انسانوں کے بنیادی حقوق کے بارے میں عالمی سطح پر اتفاق رائے قائم کیا۔ اس میں 30 شقیں شامل ہیں جو ہر انسان کے حقوق کی ضمانت دیتی ہیں۔

تاہم، عالمی طاقتوں کی اپنی ترجیحات ہیں اور وہ اپنے مفادات کے مطابق انسانی حقوق کی خلاف ورزیوں پر خاموش رہتی ہیں۔ بھارت میں کشمیری عوام کے حقوق کی مسلسل پامالی، مقبوضہ کشمیر میں ظلم و ستم اور فلسطین میں جاری انسانی حقوق کی خلاف ورزیاں عالمی سطح پر نظرانداز کی جا رہی ہیں۔ یہ ایک تکلیف دہ حقیقت ہے کہ دنیا کی بڑی طاقتوں کی خاموشی اور ان کی دوغلی پالیسیوں کا نتیجہ ترقی پذیر ممالک میں مظالم کی صورت میں نکلتا ہے۔

مقبوضہ کشمیر میں نہتے کشمیریوں کو روزانہ کی بنیاد پر تشدد، جبری پابندیوں اور انسانی حقوق کی پامالیوں کا سامنا ہے، اور اس پر عالمی برادری کی طرف سے کوئی ٹھوس اقدامات نہیں کیے جا رہے ہیں۔ یہ صورتحال اس بات کی غمازی کرتی ہے کہ دنیا کے مختلف حصوں میں انسانی حقوق کی حفاظت اور انہیں تسلیم کرنے میں یکسانیت کا فقدان ہے۔