لبنانی آرمی چیف کا جی ایچ کیو کا دورہ: فیلڈ مارشل سید عاصم منیر سے اہم ملاقات، گارڈ آف آنر پیش

راولپنڈی: لبنانی مسلح افواج کے کمانڈر ان چیف نے جنرل ہیڈ کوارٹرز (جی ایچ کیو) کا اہم دورہ کیا، جہاں عسکری قیادت کے درمیان خطے کی سکیورٹی اور دفاعی امور پر تفصیلی مشاورت ہوئی۔

جی ایچ کیو پہنچنے پر معزز مہمان کا روایتی جوش و خروش سے استقبال کیا گیا، جہاں پاکستان کی تینوں مسلح افواج کے دستوں نے انہیں گارڈ آف آنر پیش کیا۔ لبنانی فوج کے سربراہ نے یادگارِ شہدا پر حاضری دی اور فاتحہ خوانی کی۔

بعد ازاں، لبنانی سپہ سالار نے پاک فوج کے سربراہ فیلڈ مارشل سید عاصم منیر سے ملاقات کی۔ دونوں معزز عسکری رہنماؤں کے درمیان مشرقِ وسطیٰ کی موجودہ سکیورٹی صورتحال اور علاقائی امن و استحکام پر گہرائی سے بات چیت ہوئی۔
ملاقات میں دونوں ممالک کے مابین عسکری شعبے میں تعاون کو مزید وسعت دینے اور باہمی دلچسپی کے امور پر اتفاق کیا گیا۔لبنانی فوج کے سربراہ نے دہشت گردی کے خلاف جنگ میں پاک فوج کی پیشہ ورانہ صلاحیتوں کو زبردست الفاظ میں سراہا۔