بھارتی حملوں میں 26 افراد شہید اور 46 زخمی ہوئے : ڈی جی آئی ایس پی آر کی تصدیق

راولپنڈی :  ڈی جی آئی ایس پی آر لیفٹیننٹ جنرل احمد شریف چودھری نے تصدیق کی ہے کہ بھارتی حملوں میں 26 پاکستانی شہید اور 46 زخمی ہوئے ہیں۔ انہوں نے کہا کہ بھارت نے 6 اور 7 مئی کی درمیانی رات کو پاکستان پر بزدلانہ حملے کیے، جن کے دوران مختلف علاقوں میں حملے ہوئے اور بے گناہ شہریوں کو نشانہ بنایا گیا۔

انہوں نے بتایا کہ بھارتی جارحیت کے نتیجے میں مظفرآباد کے قریب مسجد بلال کو نشانہ بنایا گیا، جس میں 3 افراد شہید ہوئے۔ مریدکے میں بھی ایک مسجد پر حملہ کیا گیا، جس میں 3 مرد شہید اور ایک زخمی ہوا۔ کوٹلی میں 16 سالہ بچی اور 18 سالہ لڑکا شہید ہو گئے۔ تاہم، سیالکوٹ اور شکر گڑھ میں کسی جانی نقصان کی اطلاع نہیں آئی۔

لیفٹیننٹ جنرل احمد شریف چودھری نے کہا کہ احمد پور شرقیہ میں بھارتی حملے میں 13 افراد شہید ہوئے۔ پاکستان کی فوج نے اس حملے کا فوراً اور بھرپور جواب دیا، جس میں بھارت کے 5 جنگی طیارے اور ایک ڈرون مار گرایا گیا۔ پاک فضائیہ نے بھارتی طیاروں کو اس وقت گرایا جب وہ پاکستان کی فضائی حدود میں گھس آئے تھے۔ انہوں نے یہ بھی کہا کہ بھارت کی ایل او سی پر بلا اشتعال فائرنگ کا جواب دیا گیا، اور پاکستان کے تمام دفاعی اثاثے محفوظ ہیں۔

پاکستانی فوج کے ترجمان نے مزید کہا کہ بھارت نے نیلم جہلم ہائیڈرو پروجیکٹ کو نشانہ بنایا، مگر پاکستان کی قوم بھارت کی غلط فہمیوں کا جواب دے گی۔ انہوں نے یہ واضح کیا کہ پاکستان کسی بھی ملک کو اپنی خودمختاری اور سالمیت پر حملہ کرنے کی اجازت نہیں دے گا۔