وزیراعلیٰ پنجاب مریم نواز شریف نے راوی سٹی کے ترقیاتی کاموں کی رفتار تیز کرنے کی ہدایت دے دی

لاہور: وزیر اعلیٰ پنجاب مریم نواز شریف نے راوی سٹی منصوبے کے تحت جاری ترقیاتی کاموں کی رفتار میں تیزی لانے کی ہدایت کی ہے۔ انہوں نے حال ہی میں روڈا پیکیج 16، ایم ٹو راوی ٹول پلازا اور ریور ٹریننگ ورکس کا دورہ کیا اور منصوبے کی پیشرفت کا تفصیل سے جائزہ لیا۔

دورے کے دوران چیئرمین روڈا شاہد اشرف تارڑ، سی ای او عمران امین اور سی او او بریگیڈیئر منصور جنجوعہ نے وزیراعلیٰ کو بریفنگ دی۔ اس موقع پر مریم نواز نے کہا کہ راوی سٹی منصوبہ لاہور کی ترقی کے لیے سنگ میل ثابت ہوگا، اس لیے کام کی رفتار میں تیزی لانا ضروری ہے تاکہ اس کی بروقت تکمیل ممکن ہو سکے۔

وزیراعلیٰ نے یہ بھی کہا کہ راوی سٹی منصوبے میں جدید رہائشی سہولتیں فراہم کی جا رہی ہیں، جس سے لاہور کی بڑھتی ہوئی آبادی کو فائدہ پہنچے گا اور شہر کا بنیادی ڈھانچہ بھی مضبوط ہو گا۔