وزیر داخلہ محسن نقوی کا لاہور میں نادرا سنٹر اور پاسپورٹ آفس کا اچانک دورہ

لاہور: وفاقی وزیر داخلہ محسن نقوی نے لاہور کے علاقے فہد ٹاؤن میں نادرا سنٹر اور ڈیرہ گجراں شالیمار میں ریجنل پاسپورٹ آفس کا اچانک دورہ کیا، جہاں انہوں نے شناختی کارڈ، پاسپورٹ اور دیگر دستاویزات کے اجرا کے عمل کا جائزہ لیا۔

دورے کے دوران وزیر داخلہ نے شہریوں سے ملاقات کی اور ان کے مسائل سنے۔ اس موقع پر انہوں نے متعلقہ افسران کو فوری طور پر شہریوں کی شکایات کے حل کے لیے احکامات دیے۔ ایک بزرگ خاتون کی وہیل چیئر پر موجودگی کے پیش نظر محسن نقوی نے ان کی دستاویزات کی پروسیسنگ فوری طور پر مکمل کرنے کی ہدایت بھی کی۔

وزیر داخلہ نے کہا کہ خصوصی افراد کو ترجیحی بنیادوں پر سہولت فراہم کی جائے اور ان کے کام میں کسی قسم کی تاخیر نہ ہو۔ انہوں نے یہ بھی کہا کہ نادرا سنٹر اور پاسپورٹ آفس میں آنے والے ہر شہری کا کام طے شدہ وقت میں مکمل کیا جائے، اور شناختی دستاویزات اور پاسپورٹس کی ڈلیوری بھی مقررہ مدت میں یقینی بنائی جائے۔

شہریوں نے وزیر داخلہ کو بتایا کہ پاسپورٹ کے اجرا کے عمل میں بہت زیادہ انتظار نہیں کرنا پڑتا اور عملے کا رویہ بھی بہتر ہے، جو رہنمائی فراہم کرتا ہے۔ اس پر محسن نقوی نے حکام کو مزید ہدایت دی کہ اس عمل کو مزید بہتر بنایا جائے تاکہ شہریوں کو کسی بھی قسم کی دشواری کا سامنا نہ ہو۔

وزیر داخلہ نے اس عزم کا اظہار کیا کہ شہریوں کو اپنی شناختی دستاویزات کے حصول میں کسی بھی قسم کی مشکل پیش نہ آئے، اور حکومت اس بات کو یقینی بنائے گی کہ یہ عمل عوام کی سہولت کے مطابق جاری رہے۔