میرب علی سرجری کے بعد گھر منتقل، مداحوں سے دعاؤں کی اپیل

کراچی:  پاکستانی شوبز انڈسٹری کی معروف اداکارہ اور ماڈل میرب علی نے اپنی صحت کے بارے میں ایک اہم تفصیل شیئر کرتے ہوئے انکشاف کیا ہے کہ انگلی کے طبی مسئلے کے باعث انہیں سرجری کروانی پڑی، جس کے بعد وہ کچھ عرصہ اسپتال میں زیرِ نگرانی رہیں۔

اداکارہ نے سوشل میڈیا پلیٹ فارم پر مداحوں کو اپنی طبی صورتحال سے آگاہ کیا۔ ان کے مطابق ان کی ایک انگلی کی حرکت متاثر ہو گئی تھی اور وہ بار بار جام ہو جاتی تھی، جس سے روزمرہ کام انجام دینا مشکل ہو گیا تھا۔

میرب علی نے بتایا کہ ابتدائی طور پر ماہرینِ امراضِ جوڑ اور اعصابی امراض کے ڈاکٹروں نے ان کی حالت کو سنگین نہیں سمجھا، تاہم بعد میں آرتھوپیڈک سرجن کے تفصیلی معائنے کے بعد سرجری کا مشورہ دیا گیا۔

اداکارہ کے مطابق انہیں ابتدا میں یہ عمل معمولی لگا، لیکن بعد میں یہ آپریشن توقع سے زیادہ پیچیدہ اور طویل ثابت ہوا۔ یہ سرجری کراچی کے آغا خان یونیورسٹی اسپتال میں کی گئی، جہاں علاج کے دوران انہوں نے ایک ویڈیو بھی مداحوں کے ساتھ شیئر کی۔

انہوں نے بتایا کہ سرجری کے بعد اب ان کی حالت میں بہتری آ رہی ہے اور وہ آہستہ آہستہ صحتیاب ہو رہی ہیں۔ اس دوران مداحوں، دوستوں اور شوبز ساتھیوں کی جانب سے ان کے لیے نیک خواہشات اور دعاؤں کا سلسلہ جاری ہے۔

شوبز شخصیات میں مایا خان، درفشاں سلیم، ثناء فہد اور رابعہ کلثوم سمیت متعدد فنکاروں نے ان کی جلد صحت یابی کے لیے دعائیں کیں۔ سوشل میڈیا صارفین نے بھی انہیں آرام کرنے اور موبائل فون کا کم استعمال کرنے کا مشورہ دیا تاکہ انگلی پر مزید دباؤ نہ پڑے۔

کچھ صارفین کا کہنا ہے کہ اس طرح کے مسائل بعض اوقات ہاتھوں کے زیادہ استعمال یا مسلسل ایک ہی حرکت کرنے سے بھی پیدا ہو سکتے ہیں۔ اداکارہ کی اس خبر کے سامنے آنے کے بعد مداح ان کی جلد مکمل صحت یابی کے لیے دعا گو ہیں۔