نائب وزیراعظم اسحاق ڈار کی قازقستان کے صدر سے ملاقات

اسلام آباد: نائب وزیراعظم اور وزیر خارجہ سینیٹر اسحاق ڈار نے قازقستان کے صدر قاسم جومارت توکایووف سے ملاقات کی۔ اس ملاقات کے دوران اسحاق ڈار نے قازقستان کے صدر کو پاکستان میں خوش آمدید کہا اور صدر، وزیراعظم، حکومت اور عوام کی جانب سے نیک تمناؤں اور خیرسگالی کے پیغامات پہنچائے۔

اس موقع پر وزیر خارجہ اسحاق ڈار نے کہا کہ پاکستان اور قازقستان کے درمیان اعلیٰ سطح کے سیاسی تعلقات میں تیزی سے بہتری آئی ہے، جو کہ خوش آئند ہے۔ انہوں نے دونوں ممالک کے درمیان تعلقات میں ہونے والی مثبت پیشرفت کو سراہا۔

دونوں رہنماؤں نے اس عزم کا اظہار کیا کہ پاکستان اور قازقستان سیاسی، اقتصادی اور عوامی سطح پر مزید تعاون بڑھانے کے لیے مشترکہ طور پر کام کرتے رہیں گے۔ اسحاق ڈار نے یہ بھی کہا کہ دونوں ممالک خطے میں امن، استحکام اور ترقی کے لیے مشترکہ کوششیں کریں گے، اور باہمی تعاون کے ذریعے نہ صرف دوطرفہ تعلقات مضبوط ہوں گے، بلکہ یہ علاقائی خوشحالی کو بھی فروغ دے گا۔