جیفری ایپسٹین کا خود کو شیطان کہلائے جانے کے الزام پر ردعمل، پولیو کے خاتمے کے لیے فنڈنگ کا دعویٰ

واشنگٹن : امریکی سرمایہ کار اور جنسی مجرم جیفری ایپسٹین نے حالیہ ایک ویڈیو انٹرویو میں خود کو "شیطان" کہلائے جانے کے الزام کو مسترد کرتے ہوئے کہا کہ وہ دراصل سب سے نچلے درجے کا جنسی مجرم تھا۔ ایپسٹین نے یہ بھی دعویٰ کیا کہ اس نے پاکستان اور بھارت میں پولیو کے خاتمے کے لیے مالی مدد فراہم کی تھی۔

یہ انٹرویو امریکی حکام کی طرف سے حال ہی میں جاری کی گئی فائلوں کا حصہ ہے، جو امریکی صدر ڈونلڈ ٹرمپ کے مشیر اسٹیو بینن کے ساتھ ریکارڈ کیا گیا تھا۔ اسٹیو بینن نے ایپسٹین سے سوال کیا کہ کیا وہ خود کو شیطان سمجھتا ہے، جس پر ایپسٹین نے مسکراتے ہوئے جواب دیا کہ "نہیں، لیکن میرے پاس ایک اچھا آئینہ ضرور ہے۔" دوبارہ سوال کرنے پر اس نے کہا کہ وہ نہیں جانتا کہ اس سوال کا مقصد کیا ہے۔

ایپسٹین نے 2008 میں کم عمر لڑکیوں سے جسم فروشی کرنے کا اعتراف کیا تھا، لیکن اس نے اپنے جرائم کی شدت کو کم کرنے کی کوشش کی۔ جب بینن نے اسے امریکی قانون کے مطابق سنگین جنسی مجرم قرار دیا، تو ایپسٹین نے کہا کہ وہ "سب سے نچلے درجے کا مجرم" تھا، تاہم اس نے اپنے جرم کا اعتراف کیا۔

پولیو کے بارے میں بات کرتے ہوئے ایپسٹین نے کہا کہ اس نے پاکستان اور بھارت میں پولیو کے خاتمے کے لیے پیسہ دیا، اور یہ سوال کرنے کی بجائے کہ آیا یہ پیسہ ویکسین پر خرچ کرنا چاہیے تھا، ماؤں سے پوچھنا چاہیے جو اپنے بچوں کو ویکسین لگوا چکیں اور اب وہ پولیو سے محفوظ ہیں۔

انٹرویو کے دوران ایپسٹین نے اپنی دولت کے ذرائع پر بھی بات کی۔ بینن کے سوال پر کہ اس نے دنیا کے بدترین لوگوں کو مشورے دے کر پیسہ کمایا، ایپسٹین نے انکار کرتے ہوئے کہا کہ اس کی کمائی قانونی تھی، مگر اس نے یہ بھی تسلیم کیا کہ اخلاقیات ہمیشہ ایک پیچیدہ موضوع رہی ہیں۔

یاد رہے کہ جیفری ایپسٹین 2019 میں نیویارک کی جیل میں مردہ پایا گیا تھا، جب وہ کمسن لڑکیوں کی جنسی سمگلنگ کے مقدمے میں ٹرائل کا سامنا کر رہا تھا۔ اس کی موت کو سرکاری طور پر خودکشی قرار دیا گیا تھا، لیکن اس پر مختلف سوالات اٹھائے گئے۔ حالیہ دنوں میں ایپسٹین اور اس سے متعلق تحقیقات کی فائلیں جاری کی گئی ہیں، جن میں عالمی سطح پر اہم شخصیات جیسے ٹرمپ اور مودی کے ساتھ اس کے روابط بھی سامنے آئے ہیں۔