گوگل میپس میں نیا اے آئی فیچر: اب ہینڈز فری نیویگیشن، پیدل چلنے والوں اور سائیکلرز کے لیے بھی

کیلیفورنیا : گوگل نے اپنی مقبول نیویگیشن سروس، گوگل میپس میں ایک نیا طاقتور آرٹیفیشل انٹیلیجنس (اے آئی) فیچر متعارف کرایا ہے، جس کا مقصد ڈرائیونگ کے علاوہ پیدل چلنے والوں اور سائیکل چلانے والوں کے لیے بھی نیویگیشن کو آسان بنانا ہے۔

اس فیچر کا نام "جیمنائی فار میپس" ہے، جو نومبر 2025 میں ڈرائیورز کے لیے متعارف کرایا گیا تھا تاکہ وہ بغیر ڈیوائس کو ہاتھ لگائے نیویگیٹ کر سکیں۔ اب اسے پیدل چلنے والوں اور سائیکلرز کے لیے بھی متعارف کرایا جا رہا ہے، تاکہ یہ نیویگیشن اسسٹنٹ ہر صورتحال میں صارف کی مدد کر سکے۔

اس فیچر کا استعمال بہت آسان ہوگا۔ آپ بس "اوکے گوگل" کہہ کر اپنے راستے، قریبی جگہیں یا کسی دوسرے سوال کا جواب حاصل کر سکتے ہیں، چاہے آپ پیدل چل رہے ہوں یا سائیکل چلا رہے ہوں۔ جیمنائی کا اے آئی ماڈل آپ کو فوری ہینڈز فری جوابات دے گا۔

یہ فیچر اینڈرائیڈ اور آئی او ایس ڈیوائسز پر دستیاب ہوگا، لیکن ویب ورژن میں یہ فیچر موجود نہیں ہوگا۔ گوگل نے کہا ہے کہ یہ فیچر دنیا بھر کے صارفین کے لیے اگلے کچھ ہفتوں میں دستیاب ہو جائے گا۔

مزید یہ کہ، آپ اس فیچر کی مدد سے اپنے دوستوں یا کسی اور کو ٹیکسٹ بھی بھیج سکتے ہیں، مگر ایسا صرف اس صورت میں ہوگا جب آپ اسے اجازت دیں گے۔