بھارت نے امریکی ٹیرف دھمکی کے بعد ایف 35 جیٹ خریدنے میں دلچسپی چھوڑ دی

نئی دہلی : امریکی صدر ڈونلڈ ٹرمپ کی جانب سے بھارت کی درآمدات پر 25 فیصد ٹیرف لگانے کی دھمکی کے بعد بھارت نے امریکہ سے ایف 35 سٹیلتھ لڑاکا جیٹ خریدنے میں دلچسپی ظاہر نہیں کی۔ بلوم برگ کی رپورٹ کے مطابق، بھارت نے امریکہ کو آگاہ کیا ہے کہ وہ اب اس لڑاکا طیارے کو خریدنے کا ارادہ نہیں رکھتا۔

رپورٹ میں بتایا گیا ہے کہ بھارت اس فیصلے کے باوجود امریکہ کے ساتھ کچھ دیگر اشیاء کی خریداری بڑھانے پر غور کر رہا ہے، لیکن دفاعی سامان جیسے ایف 35 جیٹس اس میں شامل نہیں ہیں۔ یہ صورتحال امریکی صدر کی جانب سے بھارت پر ٹیرف لگانے کی دھمکی کے بعد پیدا ہوئی ہے۔

یاد رہے کہ رواں سال کے آغاز میں بھارتی وزیرِاعظم نریندر مودی کے وائٹ ہاؤس دورے کے دوران ٹرمپ نے بھارت کو ایف 35 لڑاکا طیارے فروخت کرنے کی پیشکش کی تھی، جس پر مودی نے دلچسپی کا اظہار کیا تھا۔ تاہم، اب بھارت نے اس پیشکش کو مسترد کرتے ہوئے اپنے ارادوں کا واضح اظہار کیا ہے۔

رپورٹ کے مطابق، بھارت فوری طور پر ٹرمپ کی دھمکی پر جواب دینے کی پوزیشن میں نہیں ہے اور وہ امریکہ کو ناراض کرنے سے بچنا چاہتا ہے۔ بھارت کی خواہش ہے کہ تجارتی بات چیت جاری رکھی جائے، تاہم دفاعی سامان کی خریداری اب اس میں شامل نہیں ہوگی۔

امریکی وزیر خزانہ نے بھارت پر یہ الزام عائد کیا کہ وہ روس سے تیل خرید کر اسے ریفائنڈ کر کے بیچتا ہے، اور عالمی سطح پر بھارت نے خود کو ایک ذمہ دار ملک کے طور پر پیش نہیں کیا۔ انہوں نے کہا کہ امریکی حکومت بھارت کے رویے سے مایوس ہے اور انہیں یہ سمجھنے میں مشکل ہو رہی ہے کہ دونوں ممالک کے تجارتی تعلقات کی نوعیت کیا ہوگی، کیونکہ یہ سب بھارت کے رویے پر منحصر ہے۔

اس سے قبل، ٹرمپ کی دھمکی کے بعد بھارت کی سرکاری آئل ریفائنریز نے روسی تیل کی خریداری روک دی تھی، جس سے دونوں ممالک کے تجارتی تعلقات پر مزید اثرات مرتب ہوئے ہیں۔