واٹس ایپ کا نیا فیچر: یوزرنیم کے ذریعے رابطہ کرنا ہوگا ممکن

کیلیفورنیا :واٹس ایپ جلد ہی ایک ایسا فیچر متعارف کرانے جا رہا ہے جس کے ذریعے صارفین میٹا کی دیگر ایپس جیسے انسٹاگرام اور فیس بک پر ایک ہی یوزرنیم استعمال کر سکیں گے۔ اس فیچر کا مقصد صارفین کو ایک جیسے شناخت کے ذریعے مختلف پلیٹ فارمز پر یکساں تجربہ فراہم کرنا ہے۔

اس فیچر کے تحت، صارفین آئندہ سال اپنے پسندیدہ یوزرنیم کو ریزرو کر سکیں گے، جس سے وہ اپنا فون نمبر شیئر کیے بغیر صرف یوزرنیم کے ذریعے رابطہ کر سکیں گے۔ واٹس ایپ پر یہ نئی سہولت پرائیویسی کو بڑھانے اور رابطوں کو زیادہ سادہ اور محفوظ بنانے کے لیے متعارف کرائی جا رہی ہے۔

یوزرنیم ریزرو کرنے کے لیے میٹا اکاؤنٹ سینٹر کے ذریعے ویری فکیشن کی ضرورت ہوگی، اور ایک بار ریزرو کرنے کے بعد، وہ مخصوص یوزرنیم دوسرے صارفین کے لیے دستیاب نہیں ہوگا۔ صارفین کو یہ اختیار بھی ملے گا کہ وہ واٹس ایپ پر وہی ہینڈل استعمال کریں جو وہ پہلے سے اپنے انسٹاگرام یا فیس بک پر استعمال کر رہے ہیں، جس سے ان کی شناخت میٹا ایپس پر یکساں رہے گی۔

یوزرنیم کی مخصوص شرائط بھی ہوں گی، جیسے یہ کم از کم ایک حرف پر مشتمل ہونا ضروری ہوگا اور اس میں صرف چھوٹے حروف، اعداد، ڈاٹس اور انڈراسکور استعمال کیے جا سکیں گے۔ اس کا آغاز آئندہ سال سے متوقع ہے، اور اس کے ذریعے واٹس ایپ کے صارفین کو فون نمبر شیئر کیے بغیر رابطہ کرنے کا ایک نیا اور محفوظ طریقہ ملے گا۔