جنوبی غزہ اور نابلس میں اسرائیلی فورسز کے حملوں میں مزید فلسطینی شہید، سینکڑوں زخمی

غزہ: جنوبی غزہ میں اسرائیلی فورسز کے حملے جاری ہیں، جس کے نتیجے میں مزید تین فلسطینی شہید اور متعدد افراد زخمی ہو گئے ہیں۔ اسرائیلی فوج نے نابلس میں بھی فائرنگ کی، جس میں ایک نوجوان فلسطینی اپنی جان سے ہاتھ دھو بیٹھا۔

غزہ کے جنوبی علاقے رفاہ میں اسرائیلی ہیلی کاپٹروں نے بمباری کی، جس سے کئی عمارتوں کو شدید نقصان پہنچا اور متعدد افراد زخمی ہو گئے۔ اسرائیلی حکام نے حالیہ دنوں میں مزید 15 فلسطینیوں کی مسخ شدہ لاشیں بھی واپس کر دی ہیں۔

عرب میڈیا کی رپورٹس کے مطابق، اسرائیلی حملوں میں شہید ہونے والوں کی تعداد 69 ہزار 483 ہو چکی ہے، جبکہ زخمیوں کی تعداد ایک لاکھ ستر ہزار سے تجاوز کر گئی ہے۔غزہ میں بارشوں کے سبب سینکڑوں خیمے زیرِ آب آ گئے ہیں، جس کے نتیجے میں ہزاروں افراد بے گھر ہو گئے ہیں اور ان کی مدد کے لیے فوری انسانی امداد کی ضرورت بڑھ گئی ہے۔