اداکارالبیلا کو بچھڑے 21 سال بیت گئے، مگر ان کی ہنسی آج بھی دلوں میں گونجتی ہے

لاہور: پاکستان کے لیجنڈری مزاحیہ اداکار البیلا کو ہم سے بچھڑے 21 برس ہو چکے ہیں، لیکن ان کی دل کو چھو لینے والی مزاحیہ اداکاری اور اسٹیج پر بے ساختہ جگائی گئی ہنسی آج بھی مداحوں کے ذہنوں میں تازہ ہے۔

البیلا، جن کا اصل نام اختر حسین تھا، 1941 میں گوجرہ میں پیدا ہوئے۔ انہوں نے 1970 کی دہائی میں لاہور سے اپنے فنی سفر کا آغاز کیا اور سٹیج، فلم اور ٹی وی ہر جگہ اپنی منفرد مزاحیہ اداکاری سے ناظرین کو محظوظ کیا۔

ان کا کردار "اکبر اعظم" ڈرامے اک سی بادشاہ میں آج بھی یاد کیا جاتا ہے، جو انارکلی کی کہانی پر ایک دلچسپ پیروڈی تھی۔ اس ڈرامے میں شہزادہ سلیم کا کردار امان اللہ نے نبھایا، اور اس جوڑی نے بعد میں سٹیج پر بھی خوب دھوم مچائی۔

البیلا نے سینکڑوں تھیٹر ڈراموں اور 200 سے زائد فلموں میں اداکاری کی۔ فلم وارداتیا وہ واحد فلم تھی جس میں انہوں نے مرکزی کردار ادا کیا۔ ان کا انداز، زبان کا چٹکلہ اور لوگوں کو قہقہے لگانے پر مجبور کر دینے والی اداکاری آج بھی لوگوں کے چہروں پر مسکراہٹ بکھیر دیتی ہے۔

17 جولائی 2004 کو دل کا دورہ پڑنے سے وہ ہمیشہ کے لیے خاموش ہو گئے، مگر ان کی یادیں، ان کا فن اور ان کی ہنسی آج بھی زندہ ہے۔