سرچ انجن سے 'سمارٹ اسسٹنٹ' تک کا سفر: گوگل کا جیمنائی 3 کے ساتھ بڑے انقلاب کا اعلان

کیلیفورنیا: گوگل نے اپنی روایتی پہچان بدلتے ہوئے سرچ انجن میں دنیا کا طاقتور ترین اے آئی ماڈل جیمنائی 3 شامل کر لیا ہے، جس سے انٹرنیٹ پر معلومات کی تلاش کا طریقہ ہمیشہ کے لیے بدل گیا ہے۔
گوگل کے مطابق، اب سرچ انجن صرف ویب سائٹس کے پتے نہیں بتائے گا بلکہ آپ کے سوال کا مکمل جواب ایک پیراگراف کی صورت میں خود لکھ کر دے گا۔ اس فیچر کو AI Overviews کا نام دیا گیا ہے جو اب پہلے سے کہیں زیادہ ذہین اور مفصل ہو چکا ہے۔
 سرچ رزلٹس کے ساتھ ہی ایک نئی چیٹ ونڈو نظر آئے گی، جہاں صارف اپنے سوال سے متعلق مزید گفتگو (Follow-up) کر سکے گا۔ اب سرچ کرنے کے لیے مخصوص 'کی ورڈز' کی قید ختم ہو گئی ہے؛ صارف طویل اور پیچیدہ سوالات بھی بالکل قدرتی انداز میں پوچھ سکتے ہیں۔یہ تمام فیچرز عالمی سطح پر موبائل صارفین کے لیے جاری کر دیے گئے ہیں، جس کا مقصد سرچ کے عمل کو زیادہ تیز اور انٹرایکٹو بنانا ہے۔
ٹیکنالوجی ماہرین کا ماننا ہے کہ یہ اقدام گوگل کو مصنوعی ذہانت کی دوڑ میں دوبارہ سب سے آگے لے آئے گا، کیونکہ اب صارف کو معلومات کے حصول کے لیے درجنوں لنکس کھولنے کی ضرورت نہیں رہے گی۔