واشنگٹن : دنیا کی معروف ویڈیو گیم سیریز Grand Theft Auto کے اگلے حصے GTA 6 سے متعلق مداحوں کا انتظار مزید دلچسپ ہوگیا ہے۔ Rockstar Games نے گیم کی تقریباً 26 منٹ پر مشتمل نئی گیم پلے فوٹیج جاری کردی، جس میں کہانی، کرداروں اور مختلف سرگرمیوں کی جھلک دکھائی گئی ہے۔
جاری کردہ ویڈیو کا دورانیہ 26 منٹ 48 سیکنڈ ہے اور اسے مکمل طور پر PlayStation 5 پر ریکارڈ کیا گیا ہے۔ گیم کی اس نئی جھلک کو یوٹیوب پر جاری کیے جانے سے پہلے Netflix پر بھی دکھایا گیا۔
GTA 6 میں کھلاڑی دو مرکزی کرداروں، جیسن ڈووال اور لوشیا کیمینوس، کے ساتھ کھیل سکیں گے۔ دونوں کردار گیم کی کہانی میں ایک دوسرے سے جڑے ہوئے ہیں اور متعدد مشنز میں کھلاڑی کو ان کے درمیان کردار تبدیل کرنے کا موقع ملے گا، تاہم کچھ مشنز مخصوص کردار تک محدود ہوں گے۔
نئی فوٹیج میں فائرنگ، پولیس کے ساتھ تعاقب، گاڑیوں کی تیز رفتار ڈرائیونگ، ہاتھا پائی اور سلو موشن ایکشن سمیت مختلف مناظر پیش کیے گئے ہیں، جن سے گیم کے ایکشن سے بھرپور انداز کا اندازہ ہوتا ہے۔
گیم میں کرداروں کی جسمانی حالت کو بھی زیادہ حقیقت پسندانہ بنانے کی کوشش کی گئی ہے۔ کھلاڑی کی سرگرمیوں کے مطابق جیسن اور لوشیا کی جسمانی ساخت میں تبدیلی آسکتی ہے، جبکہ ورزش، تھکن اور دیگر عوامل ان کی ظاہری شکل پر بھی اثر انداز ہوں گے۔
GTA 6 کی دنیا امریکی ریاست فلوریڈا سے متاثر خیالی ریاست Leonida پر مشتمل ہوگی، جس میں Vice City بھی شامل ہے۔ کھلاڑیوں کو مرکزی مشنز کے علاوہ کئی اضافی سرگرمیوں میں حصہ لینے کا موقع بھی ملے گا۔
ان سرگرمیوں میں تیراکی، سکوبا ڈائیونگ، جیٹ اسکی، کیاکنگ، سکائی ڈائیونگ، سٹریٹ ریسنگ، باسکٹ بال، ورزش اور نائٹ کلبز سمیت متعدد آپشنز شامل ہیں۔
GTA 6 کو 19 نومبر 2026 کو PlayStation 5 اور Xbox Series X/S کے لیے لانچ کیا جائے گا، جبکہ PC ورژن کی ریلیز کے بارے میں Rockstar Games نے ابھی حتمی تاریخ کا اعلان نہیں کیا۔