اسلام آباد : پاکستانی محکمہ موسمیات نے 2026 میں ہونے والے سورج اور چاند کے گرہنوں کا شیڈول جاری کر دیا ہے۔ اس سال دو سورج اور دو چاند گرہن ہوں گے، لیکن خوش قسمتی سے پاکستان میں صرف ایک چاند گرہن جزوی طور پر دیکھا جا سکے گا۔
پہلا سورج گرہن 17 فروری 2026 کو ہوگا۔ یہ گرہن پاکستانی وقت کے مطابق سہ پہر 3 بجے شروع ہوگا، 5 بجے اپنے عروج پر پہنچے گا، اور 7:30 بجے ختم ہو گا۔ لیکن افسوس کہ یہ گرہن پاکستان میں دکھائی نہیں دے گا۔
پہلا چاند گرہن 3 مارچ 2026 کو ہوگا، اور یہ جزوی طور پر پاکستان کے کچھ حصوں سے نظر آئے گا۔
دوسرا سورج گرہن 12 اور 13 اگست کو ہوگا، لیکن یہ بھی پاکستان میں نہیں دکھائی دے گا۔ دوسرا چاند گرہن 28 اگست 2026 کو ہوگا، مگر یہ بھی پاکستان اور جنوبی ایشیا کے بیشتر حصوں میں قابلِ مشاہدہ نہیں ہوگا۔
ماہرین فلکیات کے مطابق، یہ گرہن زمین، سورج اور چاند کے مدار میں چھوٹی تبدیلیوں کے باعث ہوتے ہیں۔ ان فلکیاتی مظاہر کا مشاہدہ سائنسدانوں کے لیے خلا کے نظام کو بہتر سمجھنے کا ایک بہترین موقع فراہم کرتا ہے۔