پاکستان قابلِ اعتماد ڈیجیٹل معیشت کی جانب گامزن

دنیا تیزی سے ڈیجیٹل معیشت کی طرف بڑھ رہی ہے اور اب معاشی ترقی صرف سڑکوں، بندرگاہوں اور فیکٹریوں تک محدود نہیں رہی بلکہ ڈیٹا، مصنوعی ذہانت (AI)، فائبر آپٹک رابطوں اور ڈیجیٹل گورننس کو ترقی کا نیا معیار سمجھا جا رہا ہے۔ پاکستان بھی اس عالمی تبدیلی کے اہم مرحلے میں داخل ہوچکا ہے جہاں معیشت، حکمرانی اور تجارت کو جدید ٹیکنالوجی کے ساتھ ہم آہنگ کیا جا رہا ہے۔ وفاقی وزیر برائے انفارمیشن ٹیکنالوجی شزا فاطمہ کا یہ اعلان کہ وفاقی حکومت 99 فیصد ای آفس کے ذریعے پیپر لیس ہوچکی ہے، دراصل اس امر کی علامت ہے کہ پاکستان بتدریج ایک قابلِ اعتماد ڈیجیٹل معیشت کی بنیاد رکھ رہا ہے۔پاکستان کی معیشت کئی برسوں سے روایتی مسائل جیسے بیوروکریسی، سست رفتار نظام، کاغذی کارروائی، بدعنوانی اور معلومات کے غیر مو¿ثر تبادلے کا شکار رہی ہے۔ ان حالات میں ڈیجیٹل گورننس نہ صرف شفافیت بلکہ رفتار اور اعتماد بھی پیدا کرتی ہے۔ ای آفس سسٹم کے ذریعے سرکاری فائلوں، نوٹسز، منظوریوں اور انتظامی امور کو آن لائن منتقل کرنے سے وقت اور وسائل دونوں کی بچت ہورہی ہے۔ اس نظام کا سب سے بڑا فائدہ یہ ہے کہ حکومتی فیصلوں میں تاخیر کم ہوگی، دستاویزات محفوظ رہیں گی اور عوامی خدمات زیادہ مو¿ثر انداز میں فراہم کی جاسکیں گی۔حکومت کا ”ڈیجیٹل نیشن پاکستان ایکٹ“ بھی اسی وڑن کا حصہ ہے جس کے تحت عالمی معیار کا ڈیجیٹل انفرااسٹرکچر تیار کیا جا رہا ہے۔ جدید ڈیجیٹل انفرااسٹرکچر صرف انٹرنیٹ یا کمپیوٹرز تک محدود نہیں ہوتا بلکہ اس میں ڈیٹا سینٹرز، سائبر سیکیورٹی، کلاو¿ڈ سسٹمز، فائبر آپٹک نیٹ ورک، ڈیجیٹل ادائیگیوں کا نظام، ای گورننس اور مصنوعی ذہانت جیسے شعبے شامل ہوتے ہیں۔ اگر پاکستان اس میدان میں کامیاب ہوتا ہے تو نہ صرف ملکی معیشت مستحکم ہوگی بلکہ عالمی سرمایہ کاروں کا اعتماد بھی بڑھے گا۔سی پیک کا دوسرا مرحلہ، جسے ”سی پیک 2“ کہا جا رہا ہے، اب صرف سڑکوں اور توانائی منصوبوں تک محدود نہیں رہے گا بلکہ یہ ”ڈیجیٹل شاہراہِ ریشم“ کی شکل اختیار کرتا جا رہا ہے۔ چین پہلے ہی دنیا میں ڈیجیٹل ٹیکنالوجی، فائبر آپٹک نیٹ ورکس، فائیو جی، ای کامرس اور مصنوعی ذہانت کے میدان میں نمایاں مقام رکھتا ہے۔ پاکستان اگر اس تجربے سے فائدہ اٹھاتا ہے تو وہ جنوبی ایشیا میں ڈیجیٹل رابطوں کا ایک اہم مرکز بن سکتا ہے۔ پاک چین فائبر آپٹک منصوبہ خطے میں ڈیٹا کے تیز رفتار تبادلے، محفوظ مواصلاتی نظام اور جدید آئی ٹی سروسز کے فروغ میں اہم کردار ادا کرے گا۔مصنوعی ذہانت یا اے آئی مستقبل کی معیشت کا سب سے طاقتور عنصر تصور کی جارہی ہے۔ دنیا کی بڑی معیشتیں اے آئی کے ذریعے صنعت، صحت، تعلیم، زراعت، بینکاری اور تجارت کے شعبوں میں انقلاب لا رہی ہیں۔ پاکستان میں بھی اگر اے آئی کو قومی پالیسی کا حصہ بنایا جائے تو نوجوانوں کیلئے روزگار کے نئے مواقع پیدا ہوسکتے ہیں۔ فری لانسنگ، سافٹ ویئر ڈویلپمنٹ، ڈیجیٹل مارکیٹنگ، سائبر سیکیورٹی اور اے آئی بیسڈ سروسز پاکستان کیلئے اربوں ڈالر کا زرمبادلہ کما سکتی ہیں۔ پاکستان کے نوجوان پہلے ہی آئی ٹی فری لانسنگ میں دنیا بھر میں نمایاں مقام رکھتے ہیں، ضرورت صرف اس امر کی ہے کہ انہیں جدید تربیت، عالمی معیار کی انٹرنیٹ سہولت اور سرمایہ کاری کے مواقع فراہم کیے جائیں۔ڈیجیٹل معیشت کا ایک اہم فائدہ یہ بھی ہے کہ اس سے شفافیت بڑھتی ہے اور بدعنوانی کے امکانات کم ہوتے ہیں۔ جب ادائیگیاں، ٹیکس نظام، سرکاری خریداری اور انتظامی معاملات ڈیجیٹل پلیٹ فارم پر منتقل ہوتے ہیں تو انسانی مداخلت کم ہوجاتی ہے۔ اس سے نہ صرف کاروبار میں آسانی پیدا ہوتی ہے بلکہ غیر ملکی سرمایہ کاروں کا اعتماد بھی بڑھتا ہے۔ عالمی ادارے بھی انہی ممالک میں سرمایہ کاری کو ترجیح دیتے ہیں جہاں ڈیجیٹل نظام مضبوط، شفاف اور محفوظ ہو۔تاہم پاکستان کو اس سفر میں کئی چیلنجز کا بھی سامنا ہے۔ سائبر سیکیورٹی، ڈیجیٹل خواندگی، دیہی علاقوں میں انٹرنیٹ کی دستیابی، بجلی کی مسلسل فراہمی اور جدید ٹیکنالوجی میں مہارت رکھنے والی افرادی قوت کی کمی اہم مسائل ہیں۔ اگر ان رکاوٹوں کو دور نہ کیا گیا تو ڈیجیٹل ترقی صرف بڑے شہروں تک محدود رہ سکتی ہے۔ حکومت کو چاہیے کہ وہ یونیورسٹیوں، آئی ٹی اداروں اور نجی شعبے کے تعاون سے نوجوانوں کو جدید ڈیجیٹل مہارتیں سکھائے تاکہ پاکستان عالمی ڈیجیٹل مارکیٹ میں مو¿ثر کردار ادا کرسکے۔آج دنیا کی معیشت ڈیٹا پر چل رہی ہے اور مستقبل انہی ممالک کا ہوگا جو ٹیکنالوجی، مصنوعی ذہانت اور ڈیجیٹل رابطوں میں آگے ہوں گے۔ پاکستان کیلئے یہ ایک سنہری موقع ہے کہ وہ سی پیک 2، ڈیجیٹل نیشن پاکستان ایکٹ اور پاک چین ٹیکنالوجی تعاون کے ذریعے اپنی معیشت کو جدید خطوط پر استوار کرے۔ اگر پالیسیوں کا تسلسل برقرار رہا، سرمایہ کاری کو فروغ دیا گیا اور نوجوانوں کو ٹیکنالوجی سے جوڑا گیا تو پاکستان نہ صرف خطے کی ایک مضبوط ڈیجیٹل معیشت بن سکتا ہے بلکہ عالمی سطح پر بھی ایک قابلِ اعتماد ٹیکنالوجی پارٹنر کے طور پر ابھر سکتا ہے۔