لاہور: وزیراعلیٰ پنجاب مریم نواز شریف کی قیادت میں ایک اہم اجلاس ہوا جس میں پنجاب بھر کے شہروں اور دیہات کی ترقی کے لیے کئی بڑے منصوبوں کی منظوری دی گئی۔ ان منصوبوں کا مقصد شہری اور دیہی زندگی کو بہتر بنانا اور عوام کو بنیادی سہولتیں فراہم کرنا ہے۔
اجلاس میں بتایا گیا کہ پہلے مرحلے میں پنجاب کے 59 بڑے شہروں میں سیوریج اور نکاسیٔ آب کا نظام بہتر بنایا جائے گا۔ بارش کے پانی کو محفوظ کرنے کے لیے رین واٹر ٹینک لگائے جائیں گے، اور پانی کی فراہمی کے لیے ٹیوب ویلوں کو سولر انرجی پر منتقل کیا جائے گا تاکہ بجلی کے اخراجات کم ہوں۔
شہروں کی گلیوں میں ٹف ٹائلز لگائی جائیں گی اور مرمت کا کام کیا جائے گا۔ ساتھ ہی پارکوں کو بہتر بنایا جائے گا اور بچوں کے لیے جھولے اور کھیلوں کی سہولتیں فراہم کی جائیں گی۔ وزیراعلیٰ مریم نواز نے ہدایت کی کہ دیہات کو بھی ترقی کے عمل میں شامل کیا جائے۔ دیہی علاقوں میں گلیوں کی پختگی، نکاسی آب کا نظام، اور قبرستانوں میں صفائی اور چار دیواری کا بندوبست کیا جائے گا۔ دیہات میں پلے گراؤنڈز اور پارکس بھی بنائے جائیں گے۔
ایک خاص منصوبے کے تحت دیہات کے جوہڑوں (گندے پانی والے تالابوں) کو بائیوٹیکنالوجی سے صاف کیا جائے گا، جہاں مخصوص پودے لگائے جائیں گے جو پانی کی بدبو اور گندگی کو ختم کریں گے۔ اس کے علاوہ 4500 کلومیٹر دیہی سڑکیں مرمت ہوں گی اور ہر یونین کونسل میں عوامی سہولت کے لیے دفاتر، میٹنگ ہال اور کونسل روم بنیں گے۔
مریم نواز نے کہا کہ "ستھرا پنجاب پروگرام" کامیابی سے جاری ہے اور ہم سب کو اپنا کردار ادا کرتے ہوئے اپنے علاقوں کو صاف اور بہتر بنانا ہوگا۔