اسلام آباد: وزارت خزانہ نے اپنے ماہانہ معاشی آؤٹ لُک رپورٹ میں کہا ہے کہ نومبر کے مہینے میں مہنگائی کی شرح 5 سے 6 فیصد کے درمیان رہنے کا امکان ہے۔ رپورٹ کے مطابق، پاکستان کی معاشی صورتحال ابھی تک احتیاطی طور پر مثبت نظر آ رہی ہے، اور معیشت میں بتدریج بہتری کا عمل جاری ہے۔
رپورٹ کے مطابق، لارج اسکیل مینوفیکچرنگ (ایل ایس ایم) سیکٹر اور آئی ٹی کی برآمدات میں اضافہ دیکھنے کو ملا ہے، اور حکومتی اقدامات کے نتیجے میں مالی استحکام حاصل ہو رہا ہے۔ ان اقدامات نے نہ صرف معیشت کو مستحکم کیا ہے بلکہ زرعی اور صنعتی شعبوں میں بھی بہتری کی توقع ہے۔
رپورٹ میں بتایا گیا ہے کہ خوراک کی قیمتوں اور زرعی پیداوار پر دباؤ برقرار رہا، مگر حکومتی اقدامات سے سپلائی کی صورتحال میں بہتر ہونے کی امید ہے۔ خاص طور پر ربیع سیزن کے دوران زرعی سپلائی میں استحکام آنے کی توقع ہے۔
وزارت خزانہ نے یہ بھی بتایا ہے کہ عوامی قرضے میں 1371 ارب روپے کی کمی واقع ہوئی ہے، اور پانچ سال کے بعد پہلی بار کسی سہ ماہی میں قرضوں میں واضح کمی دیکھی گئی ہے۔ رپورٹ میں کہا گیا کہ مہنگے قرضوں کی قبل از وقت ادائیگی کے سبب مالی خطرات میں کمی آ سکتی ہے، اور اس سے ملک کی مالی صورتحال مزید مستحکم ہو سکتی ہے۔
رپورٹ میں کہا گیا ہے کہ معیشت میں استحکام کی سمت میں پیش رفت ہو رہی ہے اور ساختی اصلاحات کے نتائج آنا شروع ہو گئے ہیں۔ مالی نظم و ضبط میں بہتری آئی ہے اور حکومت نے اپنے اخراجات میں محتاط حکمت عملی اختیار کی ہے جس سے مالی خسارے میں کمی آ رہی ہے۔
وزارت خزانہ نے یہ بھی بتایا کہ ترسیلات زر میں اضافہ دیکھنے کو مل رہا ہے، جس کے نتیجے میں پاکستان کی اقتصادی صورتحال میں مزید استحکام آیا ہے۔ حکومتی اقتصادی اقدامات کے نتیجے میں ملک کی مجموعی معاشی صورتحال میں مزید بہتری کی توقع ہے۔